Дархан-Уул аймагт төрийн аудитын байгууллагуудын “Харилцан туршлага солилцох өдөрлөг” амжилттай зохион байгуулагдлаа. Энэхүү өдөрлөгт Үндэсний аудитын газар болон нийслэл, Дархан-Уул, Сэлэнгэ, Орхон аймгийн төрийн аудитын газрууд оролцсон бөгөөд төрийн санхүү, төсвийн хяналтын үр нөлөөг нэмэгдүүлэх, харилцан суралцах зорилготой байв.

Өдөрлөгийг Монгол Улсын Ерөнхий аудитор Д.Загджав нээж үг хэлэхдээ “Аудитын үр дүнгээр иргэдийн амьдралд эерэг нөлөө үзүүлэх нь бидний эрхэм зорилго юм. Төрийн санхүү, төсвийн хяналтыг хараат бусаар хэрэгжүүлж, хуулиар хүлээсэн үүргээ нэр төртэй биелүүлэхийн төлөө ажиллахыг уриалж байна” хэмээн онцолж, орон нутгийн албан хаагчидтай газар дээр нь уулзаж, нөхцөл байдалтай танилцаж байгаадаа сэтгэл хангалуун байгаагаа илэрхийлжээ.

Мөн тэрбээр цаашид баруун, зүүн, говь, хангайн бүс нутгуудад ажиллаж, орон нутгийн түвшинд төрийн аудитын байгууллагын чиг үүрэг, хэрэгжилт, тулгамдаж буй асуудалтай танилцахаар төлөвлөж буйг дурдсан байна.

Өдөрлөгийн хүрээнд оролцогч байгууллагууд өөрсдийн үйл ажиллагааг танилцуулж, чөлөөт хэлэлцүүлэг өрнүүлэн, харилцан туршлагаа хуваалцсан бөгөөд нөхөрсөг спортын тэмцээн ч зохион байгуулагджээ.

Эх сурвалж: Үндэсний аудитын газар.