Улаанбаатар хотын агаарын бохирдлыг бууруулах ажлын хүрээнд дүүргүүдэд ногоон бүс тогтоож, түлшний хэрэглээг бууруулах, газ болон сэргээгдэх эрчим хүчний хэрэглээг нэмэгдүүлэх шийдвэр гаргалаа.

Үүнтэй холбоотойгоор нийслэлээс олон улсын байгууллагуудтай хамтран гэр хорооллын айл өрхүүдийг сэргээгдэх эрчим хүчний хэрэглээнд шилжүүлэх төсөл хэрэгжүүлж байна.

Төслийн хүрээнд Сонгинохайрхан дүүргийн 31, 43 дугаар хорооны зургаан өрх дулаан, цахилгааны эх үүсвэрээ сэргээгдэх эрчим хүч ашиглан шийдэж, өрхийн зуух, түлшний хэрэглээг бууруулжээ.

"Нүүрснээс нар руу" төслийг өргөжүүлнэ

Энэхүү сайн жишгийг бусад хороодын өрхүүдэд нэвтрүүлэх зорилгоор газар чөлөөлөлтөд хамрагдаагүй айл өрхүүдийг сэргээгдэх эрчим хүчний хэрэглээнд шилжүүлэх ажлыг эхлүүлэхээр төлөвлөж байна.

Төслийн хүрээнд дараах хороодын шалгуур хангасан айл өрхүүд хамрагдана:

• 3, 6, 7, 8, 23, 26, 30, 36, 31, 43 дугаар хороод

Эдгээр айл өрхийн дулаан, цахилгааны эх үүсвэрийг сэргээгдэх эрчим хүч ашиглан шийдэж, мөн дулаалга хийснээр агаарт ялгарах бохирдол, хүлэмжийн хийг бууруулах зорилготой.

Мөн Сонгинохайрхан дүүргийн Толгойт, Баянхошуу дэд төвийг түшиглэн гэр хорооллыг орон сууцжуулах төлөвлөгөөтэй байгаа бөгөөд энэ төсөлд хамрагдахгүй үлдсэн өрхүүдийг сэргээгдэх эрчим хүчээр хангах ажлыг зохион байгуулахаар болжээ.

СХД-ийн Засаг даргын байр суурь

Сонгинохайрхан дүүргийн Засаг дарга Ц.Баттөр энэ талаар:
"Ногоон бүсэд багтаж буй хороодод LPG, цахилгаан, сэргээгдэх эрчим хүчний хэрэглээг нэвтрүүлэхээр болсон. Бид энэ бүсэд хамаарахгүй байгаа хороодын түлшний хэрэглээг бууруулах зорилтын хүрээнд сэргээгдэх эрчим хүчийг нэвтрүүлэх хэрэгтэй. Үүний тулд хорооноос шалгуур хангасан өрхүүдийн судалгааг гарган, төсөл хэрэгжүүлэгч нэгжтэй хамтран ажиллах нь чухал. Өмнө нь хоёр хороонд амжилттай хэрэгжсэн энэ төслийг өргөжүүлснээр хүлэмжийн хийн ялгарлыг бууруулах боломжтой" хэмээн ярив.

Энэхүү төсөл нь гэр хорооллын иргэдийн эрүүл, аюулгүй амьдрах орчныг бүрдүүлэхэд чухал ач холбогдолтой гэж албаныхан онцолж байна.