Манай улсын мэдээллийн технологийн салбарт 30 мянга орчим мэргэжилтэн шаардлагатай байгаа бөгөөд Цахим хөгжил, инновац, харилцаа холбооны яам (ЦХИХХЯ) ойрын дөрвөн жилд 20 мянган хүнийг бэлтгэх зорилт тавиад байна. Үүний хүрээнд хувийн хэвшил, төрийн байгууллагууд, их дээд сургууль, сургалтын төвүүдтэй хамтран ажиллахыг салбарын сайд Ц.Баатархүү онцолжээ.
Одоогийн ажиллах хүчин:
- Харилцаа холбоо, мэдээллийн технологийн салбарт 12,754 компани үйл ажиллагаа явуулж байна.
- Эдгээр компаниудад 12 мянга гаруй хүн ажиллаж байгаа бөгөөд:
- 23.39% нь үүрэн холбооны үйлчилгээ
- 15.30% нь мэдээлэл, холбооны сүлжээ
- 10.27% нь кабель шугам, цамхаг угсралтын салбарт
- Бусад нь өргөн нэвтрүүлгийн телевиз, олон суваг дамжуулах үйлчилгээ, шуудангийн сүлжээнд ажилладаг байна.
Салбарын эдийн засгийн үзүүлэлт:
Үндэсний статистикийн хорооны мэдээлснээр, мэдээлэл, харилцаа холбооны салбарын орлого 2023 онд 2.5 их наяд төгрөгт хүрч, өмнөх оноос 367.1 тэрбум төгрөгөөр (17.4%) өссөн нь энэ салбарын хурдацтай хөгжиж буйг илтгэж байна.
Энэ өсөлттэй уялдуулан шаардлагатай боловсон хүчнийг бэлтгэх нь технологийн салбарын өрсөлдөх чадварыг нэмэгдүүлэхэд чухал ач холбогдолтой юм.
Эх сурвалж: Цахим хөгжил, инновац, харилцаа холбооны яам
