Монгол Улсад зам, тээврийн салбар үүсэж хөгжсөний 100 жилийн ойг тохиолдуулан анх удаа эмэгтэйчүүдийн зөвлөгөөнийг зохион байгууллаа.

1990 оноос хойш автотээвэр, төмөр зам, авто зам, далай, усан зам, иргэний нисэхийн тээврийн үйлчилгээ өргөжин тэлж, Ази, Европыг холбосон тээвэр логистикийн сүлжээ байгуулах томоохон зорилго тавьсан. Энэ хүрээнд 2024 онд агаарын тээврээр 2.2 сая зорчигч тээвэрлэж, МИАТ компани нэг сая дахь зорчигчоо бүртгэн авчээ. “Чингис хаан” нисэх буудал олон улсын үйлчилгээний дөрвөн одтой нисэх буудал болж, дэлхийн 100 том хотын нисэх буудлуудтай үйлчилгээний чанар, стандартын хувьд өрсөлдөхүйц түвшинд хүрч байна.

Автотээврийн салбарын хувьд 17 улстай хэлэлцээр байгуулж, 22 улстай олон улсын автотээвэрлэлт хийх боломжтой болсон. Уул уурхайн экспортын тээвэрлэлт өсч, 82.8 сая тонн ачаа тээвэрлэжээ.

Энэхүү зөвлөгөөн нь зам, тээврийн салбарын эмэгтэйчүүдийн ажиллах орчин нөхцөлийг сайжруулах, чадавхжуулах, мэргэшүүлэх асуудлыг хөндсөнөөрөө онцлог байлаа. Зам, тээврийн салбарт 83 мянган хүн ажиллаж байгаа бөгөөд тэдний 40 хувийг эмэгтэйчүүд эзэлж байна. Энэ нь өмнөх оныхоос 3.7 хувиар өссөн үзүүлэлт юм.

Зам, тээврийн хөгжлийн яамны Автотээврийн бодлого зохицуулалтын газрын дарга Э.Мөнхнасан:
"Энэхүү зөвлөгөөнөөр зам, тээврийн салбарт ажиллаж буй эмэгтэйчүүдийн хөдөлмөрийн нөхцөл, нийгмийн оролцоог нэмэгдүүлэх, мэргэшүүлэх талаар зөвлөмж гаргана. Үүнийг төрийн болон хувийн хэвшлийн байгууллагуудад хүргүүлж, цаашид эмэгтэйчүүдийн ажиллах орчныг сайжруулахад чиглэсэн арга хэмжээ авна" хэмээн онцлов.

Анх удаа зохион байгуулсан энэхүү зөвлөгөөн нь цаашид эмэгтэйчүүдийн оролцоог нэмэгдүүлэх, тэдний ажиллах нөхцөлийг сайжруулахад бодитой үр дүн авчрахыг зорьж байна.