Зайсангийн зүүн гүүр буюу хуучин гүүрийг энэ оны нэгдүгээр сарын 10-наас хааж, буулгах ажлыг эхлүүлсэн бөгөөд өнөөдөр уг гүүрийг бүрэн буулгаж дууслаа. Оронд нь шинэ гүүр барих өрөмдлөгийн ажил эхэлсэн бөгөөд уг гүүрийг зургаадугаар сард ашиглалтад оруулахаар төлөвлөж байна.

Нийслэлийн Замын хөгжлийн газрын гүүрийн хяналтын мэргэжилтэн Б.Жаргалдүүрэн ажлын явцтай газар дээр нь танилцжээ. Одоогоор шинэ гүүрний шон суурь цутгах, арматур бэлтгэх, дам нурууг зөөх зэрэг ажлууд хийгдэж байгаа аж. Дам нурууг бэлтгэж, зөөвөрлөх ажил дөрөвдүгээр сард бүрэн дуусах бөгөөд нийт 50 дам нуруунаас 26-г нь зөөвөрлөж дууссан байна.

Шал суурийн арматурын бэлтгэл ажил 100 хувь хийгдэж дууссан бөгөөд газрын түвшнээс доош 17 метр гүнд 70 ширхэг шон суурь байрлуулах ажил үргэлжилж байна. Өнөөдрийн байдлаар 26 суурийг өрөмдөөд байгаа бөгөөд өдөрт хоёр суурийг өрөмдөж, дөрөвдүгээр сарын эхээр дуусгахаар төлөвлөжээ. Уг байршилд усны түвшин гүн байгаа тул усыг дамжуулж өрөмдлөг хийх ажлыг онцгой нөхцөлтэйгөөр гүйцэтгэж байна.

Зайсангийн хуучин гүүрийг 1968 онд ашиглалтад оруулж байсан бөгөөд 2012 онд хэзээ мөдгүй нурж болзошгүй гэсэн дүгнэлт гарчээ. Иймээс 2022 оноос эхлэн 225 метр урт, дөрвөн эгнээ бүхий төмөрбетон хос гүүр барих төслийг эхлүүлсэн юм. Өнгөрсөн онд баруун гүүрийг шинэчилж, 2023 оны есдүгээр сард ашиглалтад оруулсан бөгөөд одоо зүүн гүүрийг шинэчлэх ажил ид өрнөж байна.

Мэргэжилтнүүдийн мэдээлснээр, Зайсангийн шинэ гүүрийг төлөвлөсөн хугацаанд ашиглалтад оруулахаар ажлыг эрчимжүүлэн үргэлжлүүлж байна.