Гэр хорооллын дахин төлөвлөлтийн хүрээнд хэрэгжиж буй "Ногоон нуур 1008 айлын орон сууц" төслийн ажлын явц 70 гаруй хувьтай байгаа бөгөөд ирэх долоодугаар сард ашиглалтад оруулахаар төлөвлөж байна. Тус төсөл нь БНХАУ-ын Засгийн газрын 350 сая юанийн буцалтгүй тусламжийн хөрөнгөөр хэрэгжиж байгаа юм.

Төслийн ерөнхий инженер н.Эрдэнэсүрэн төслийн явцын талаар мэдээлэхдээ, 2021 оноос барилгын ажил эхэлсэн бөгөөд барилгууд нь 8-21 давхар бүхий бүрэн цутгамал хийцтэй болохыг онцоллоо. Барилга нь доороо газар доорх гарааштай бөгөөд одоогоор дотор инженерийн шугам сүлжээний холболтууд хийгдэж, дотор заслын ажил үргэлжилж байна.

Барилгын онцлог:

• 8-21 давхар бүхий бүрэн цутгамал хийцтэй.
• Гадна фасад: 1-3 давхар нь чулуун өнгөлгөөтэй, дээшээ металл хавтангаар бүрсэн.
• Орон сууцны сонголт:
  • 50.5 м² болон 49 м² талбай бүхий 2 өрөө байрнуудтай.
  • Давхар бүрт 6 айлтай.
• Зөвхөн орон сууцны зориулалттай (үйлчилгээний зориулалтгүй).

Барилгын гүйцэтгэгчээр БНХАУ-ын компани ажиллаж байгаа бөгөөд тусгай хэв ашиглан цутгалтын ажлыг хийж гүйцэтгэсэн байна. Инженерүүдийн дүгнэлтээр барилгын бетон хийцийн нягтаршил, чанар өндөр түвшинд хийгдсэн гэж үзжээ.

Мөн тус төслийн хүрээнд сургууль, цэцэрлэгийн байгууламж баригдаж байгаа бөгөөд улсын төсвийн хөрөнгөөр санхүүжүүлэн хэрэгжүүлж байна.

Эх сурвалж: Ногоон нуур 1008 айлын орон сууц төсөл