Өнөөдөр Монгол Улсад Үндэсний сэтгүүл зүйн салбар үүсэж хөгжсөний 112 жилийн ой тохиож байна. 1913 оны гуравдугаар сарын 6-нд “Шинэ толь хэмээх бичиг” сонины анхны дугаар хэвлэгдэн гарснаар Монголд орчин үеийн хэвлэл, мэдээллийн салбарын үндэс тавигдсан түүхтэй.
Монголын нийслэл Хүрээнд сонин гарч эхэлсэн нь тухайн үеийн соёлын томоохон хувьсгал байсан бөгөөд уг сонин 50 орчим хуудастай сэтгүүл хэлбэрээр гарч, 500 хувь хэвлэгдэн төрийн байгууллагуудад тараагдаж байв. Энэхүү өдрийг Монголын Үндэсний сэтгүүл зүй үүссэн өдөр хэмээн 2009 оноос эхлэн жил бүр тэмдэглэж иржээ.
“Шинэ толь хэмээх бичиг” сониныг Буриадын их номын хүн, соён гэгээрүүлэгч Ж.Цэвээн эрхлэн гаргаж байв. Тэрбээр Монголд анхны хэвлэх үйлдвэрийн шавыг тавьж, Судар бичгийн хүрээлэнг байгуулсан бөгөөд түүх, угсаатны зүй, соёлын чиглэлээр олон арван эрдэм шинжилгээний өгүүлэл бичиж, дэлхийн сонгодог бүтээлүүдийг монгол хэлнээ хөрвүүлэн, Монголын соёл, боловсролын түүхэнд үнэтэй хувь нэмэр оруулсан байна.
