Нийслэлийн хэмжээнд 2025 оныг “Бүтээн байгуулалтын жил” болгон зарлаж, авто замын шинэчлэл, түгжрэлийг бууруулах чиглэлээр олон төсөл хэрэгжүүлэхээр төлөвлөжээ. Энэ хүрээнд 10 байршилд шинээр зам барих, 41 байршилд авто замыг шинэчлэх ажлыг гүйцэтгэхээр болсон байна.
Өнгөрсөн онд нийт 137.1 км авто замыг шинэчилсэн нь сүүлийн 10 жилийн дундажтай харьцуулахад 10 дахин их үзүүлэлт болжээ.
Төлөвлөж буй зам, гүүрийн бүтээн байгуулалт:
- Наадамчдын гудамжийг Нэгдүгээр хороололтой холбох 800 метр гүүрэн байгууламж
- Тоньюукукийн замаас Плэйтайм аялал жуулчлалын цогцолбор хүртэлх авто зам
- Морингийн даваа болон Цагаан давааны төвлөрсөн хогийн цэг рүү явах авто зам
Мөн нэгдүгээр тойргийн замын техник, эдийн засгийн үндэслэл боловсруулж, зургаадугаар сард барилгын ажлын гүйцэтгэгчийг сонгон шалгаруулах тендерийг зарлаж, наймдугаар сард угсралтын ажлыг эхлүүлэхээр төлөвлөжээ. Түүнчлэн Туулын хурдны замын гүйцэтгэгчийг сонгон шалгаруулах тендерийг зарласан бөгөөд дөрөвдүгээр сард багтаан барилга угсралтын ажлыг эхлүүлэх юм.
Авто замын ажлын хүрээнд хийгдэх гол ажлууд:
- Суурь асфальт бетон хучилт хийх
- Худгийн таг өндөрлөх
- Шинээр ус зайлуулагч байгуулах
- Замын хашлага солих
Эдгээр ажлуудыг хэрэгжүүлснээр нийслэлийн авто замын сүлжээний чанар сайжирч, иргэдийн амьдралын орчин нөхцөл дээшлэхийн зэрэгцээ авто замын түгжрэлийг бууруулахад томоохон ахиц гарах юм.
