Монгол Улсын Засгийн газрын 2017 оны 199, 2025 оны 115 дугаар тогтоол болон Эрчим хүчний зохицуулах хорооны 2023 оны 724, 2025 оны 42 дугаар тогтоолын дагуу гэр хорооллын айл өрхийн цахилгааны шөнийн тарифын 100 хувийн хөнгөлөлтийн хугацааг сунгах шийдвэр гаргалаа.
Өмнө нь 21:00-06:00 цагийн хооронд хэрэгжиж байсан уг хөнгөлөлтийн хугацааг 21:00-09:00 цаг хүртэл уртасгасан байна. Мөн цахилгааны хэрэглээний дээд хязгаарыг нэмэгдүүлж, 220 В-ын сүлжээнд холбогдсон хэрэглэгчдийн хязгаарыг 700 кВт.ц-аас 1500 кВт.ц, 380 В-ын сүлжээнд холбогдсон хэрэглэгчдийн хязгаарыг 1500 кВт.ц-аас 3000 кВт.ц болгон тус тус нэмэгдүүллээ.
Энэхүү хөнгөлөлт нь нийслэл болон аймгийн төв, 10 мянгаас дээш хүн амтай сум, суурингийн гэр хорооллын бүсэд амьдардаг айл өрхүүдэд хамаарах бөгөөд тухайн бүс нутагт орших шөнийн цахилгаан халаагуур ашигладаг хэрэглэгчдийн тарифыг бүрэн чөлөөлөх юм.
Шөнийн тарифын хөнгөлөлт 2025 оны 2 дугаар сарын 1-нээс 4 дүгээр сарын 1-ний өдрийг хүртэл хүчин төгөлдөр мөрдөгдөнө.
Эх сурвалж: Эрчим хүчний яам, Эрчим хүчний зохицуулах хороо, Улаанбаатар цахилгаан түгээх сүлжээ ТӨХК.
