Авлигатай тэмцэх газраас нийслэлийн хэмжээнд нийтийн эзэмшлийн зам талбайд тээврийн хэрэгслийн төлбөртэй зогсоол ажиллуулахтай холбоотой дүрэм, журамд хяналт хийж, эрх зүйн зохицуулалтыг шинэчлэх шаардлагатай талаар Зөвлөмж хүргүүллээ.
АТГ-ын мэдээлснээр, одоогийн мөрдөж буй "Нийтийн эзэмшлийн зам талбайд тээврийн хэрэгслийн төлбөртэй зогсоол ажиллуулах журам" нь НИТХ-аас батлагдсан байдаг. Гэвч Нийслэлийн Засаг даргын 2023 оны А/840 дугаар захирамжаар "Нийслэл Улаанбаатар хотын нутаг дэвсгэрт тээврийн хэрэгслийн зогсоол ашигласны төлбөр авах үйл ажиллагааны журам" батлагдсан нь давхардсан зохицуулалт үүсгэж, хуульд нийцэхгүй байдал бий болгожээ.
АТГ-аас эрх зүйн зохицуулалтыг тодорхой болгож, хуульд нийцүүлэх чиглэлээр дараах арга хэмжээг авахыг зөвлөсөн байна:
- Журмын зүйл, заалтуудыг Авто замын тухай хууль, Нийслэлийн түгжрэлийг бууруулах, гэр хорооллыг орон сууцжуулах тухай хуультай нийцүүлэх
- Төлбөртэй зогсоолын үйл ажиллагааг иргэдэд ойлгомжтой байдлаар журамлах
- Шинэ журмыг хуулийн хүрээнд шинэчлэн баталж, хуучирсан зохицуулалтыг хүчингүй болгох
- Хяналт тавих чиг үүргийн давхардлыг арилгах
- Үйлчилгээний төлбөрийг эдийн засгийн үзүүлэлт, хүн амын амьжиргааны түвшин, хөдөлмөрийн хөлсний доод хэмжээтэй уялдуулан тогтоох
- Төлбөртэй зогсоолын үйл ажиллагааг хариуцах аж ахуйн нэгжүүдийг нээлттэй сонгон шалгаруулах, ил тод байдлыг нэмэгдүүлэх
АТГ-аас энэхүү зөвлөмжийг холбогдох байгууллагуудад хүргүүлсэн бөгөөд нийтийн эзэмшлийн зам талбайн төлбөртэй зогсоолын үйл ажиллагааг иргэдэд илүү ойлгомжтой, шударга зохицуулалттай болгох шаардлагатайг онцолжээ.
Эх сурвалж: Авлигатай тэмцэх газар
