Нийслэлийн хэмжээнд бүх нийтийн их цэвэрлэгээг 2025 онд зургаан удаа зохион байгуулахаар төлөвлөсөн бөгөөд эхний их цэвэрлэгээг сар шинийн баярыг угтан хоёрдугаар сарын 22, 23-ны өдрүүдэд бүх дүүргийн хэмжээнд өрнүүллээ.
Улаанбаатар хотын Ерөнхий менежерийн 2025 оны 01 дүгээр тушаалын дагуу хэрэгжсэн уг ажлын хүрээнд нийт 12,752 аж ахуйн нэгж, байгууллагын 34,957 ажилтан, албан хаагч, иргэн оролцож, нийтийн эзэмшлийн 12,036,116 мкв талбайгаас 4060.5 тонн хог хаягдал цэвэрлэсэн байна.
Цэвэрлэгээний гол ажлууд:
- Байгууллага, аж ахуйн нэгжүүд орчныхоо 50 м хүртэлх нийтийн эзэмшлийн зам талбайг цэвэрлэж, хашаа, хогийн сав, автобусны буудал, нүхэн болон гүүрэн гарцыг угааж, өнгө үзэмжийг сэргээв.
- Гудамж, зам талбайн хог хаягдал, хатсан шарилж ургамлыг цэвэрлэв.
- Айл өрх, аж ахуйн нэгжүүдийн хог хаягдлын ачилтыг эрчимжүүлж, үүсмэл хогийн цэгүүдийг ачиж зайлуулав.
- Нийтийн эзэмшлийн зам талбай дахь сандал, хогийн сав, хайс хашлага, замын тэмдэг, гэрэлтүүлгийн шон, хөшөө, баримлыг цэвэрлэж, засварлалаа.
- Өнгө үзэмжгүй хаяг, зарлалын самбаруудыг буулгаж, тохижилтыг сайжруулав.
Цэвэрлэгээнд оролцсон байгууллага, иргэд:
- Төрийн байгууллагын 3200 гаруй ажилтан, албан хаагч
- ААНБ-ын 11,127 байгууллагын 23,397 ажилтан
- Сууц өмчлөгчдийн холбооны (СӨХ) 1,196 байгууллагын 4,860 ажилтан
- Хог хаягдлын үйлчилгээний 68 байгууллагын 3,500 ажилтан
Иргэд, аж ахуйн нэгж, төрийн байгууллагууд хамтран зохион байгуулсан уг их цэвэрлэгээний ажил нь нийслэлийн өнгө үзэмжийг сэргээж, цэвэр цэмцгэр орчин бүрдүүлэхэд чухал ач холбогдолтой боллоо.
Эх сурвалж: Нийслэлийн Засаг даргын Тамгын газар
