Хууль зүйн байнгын хорооны дарга Д.Цогтбаатар болон бусад гишүүд 2025 оны нэгдүгээр сарын 23-нд УИХ-ын дарга Д.Амарбаясгаланд Хууль тогтоомжийн тухай хуульд нэмэлт, өөрчлөлт оруулах тухай хуулийн төслийг өргөн мэдүүллээ.
Энэхүү хуулийн төсөл нь Монгол Улсын Үндсэн хууль, “Алсын хараа-2050” хөгжлийн баримт бичиг, УИХ-ын 2024-2028 оны стратеги төлөвлөгөөтэй уялдан боловсруулагдсан бөгөөд хууль тогтоомжийн үр нөлөөг сайжруулах, хүний эрх, эрх чөлөөг баталгаажуулах, хууль хоорондын давхардал, зөрчлийг арилгахад чиглэжээ.
Төслийн онцлох зохицуулалтууд:
- Үр нөлөөний үнэлгээ: Хууль санаачлагчид төслүүдийн үр нөлөөг хараат бус судалгааны байгууллагаар үнэлүүлдэг байх.
- Хүний эрхийн нийцэл: Төслүүдийн хүний эрхэд нийцэх байдлыг тодорхой аргачлалаар үнэлэх.
- Санхүүгийн тооцоо: Төсөл хэрэгжүүлэхэд гарах зардлыг нарийвчлан тооцож, шаардлагатай бол харьцуулсан судалгаа хавсаргах.
- Эрх зүйн орчны шинэчлэл: Хуульд нэмэлт, өөрчлөлт оруулахдаа дагалдах судалгаа, үнэлгээг багтаах, олон нийтийн оролцоог хангах.
- Захиргааны хэм хэмжээний акт: Ийм актаар хүний эрхийг хязгаарлахгүй, зөвхөн хуульд заасан эрх зүйн зохицуулалтыг хэрэгжүүлэх зорилготой байх.
Түүнчлэн, тав болон түүнээс дээш жил хэрэгжсэн хуульд нэмэлт, өөрчлөлт оруулах үед биелэлтийн үр дагаврын үнэлгээг заавал хийх зохицуулалтыг хуульд тусгажээ.
Төсөл батлагдсанаар:
Хууль тогтоомжийн хэрэгжилт, үр нөлөө сайжирч, аливаа хуулийн агуулга Үндсэн хуулийн зарчимд нийцэн, хүний эрх, эрх чөлөөг баталгаажуулах эрх зүйн орчин бүрдэнэ. Түүнчлэн хууль хоорондын давхардал, хийдэл, зөрчил арилж, хууль тогтоомжийн чанар, үр өгөөж нэмэгдэх чухал ач холбогдолтой гэж төсөл санаачлагчид үзэж байна.
Эх сурвалж: УИХ-ын Хэвлэл мэдээллийн газар
