Увс аймгийн Нийтийн номын сан дахь Америкийн соёл мэдээллийн төвд АНУ-ын Монгол дахь ЭСЯ-аас сүүлийн дөрвөн жилийн хугацаанд 400 гаруй сая төгрөгийн хөрөнгө оруулалт хийжээ.

Монгол дахь Америкийн соёл мэдээллийн төвүүд нь Монгол Улсын иргэдийг АНУ-ын түүх соёл, боловсрол, ард түмний тухай мэдээллийн эх сурвалжаар хангах зорилготой ба Увс аймагт 2017 онд байгуулжээ.

Олон улсын хэмжээнд Америкийн соёл мэдээллийн төв нь орчин, ажиллах хүч, тохижилт, техник хэрэгсэл гээд тодорхой стандарттай ба 2023 оны 7 дугаар сараас Увс аймаг дахь тус төв уг стандартыг нь бүрэн хангаж, үйл ажиллагаагаа албан ёсоор өргөжүүлэн Олон Улсын хэмжээнд ажиллаж буй 600 гаруй мэдээллийн төвүүдийн нэг болжээ.

Ингэснээр жил бүр АНУ-ын Засгийн газраас 20 мянган долларын буцалтгүй тусламж авч, төсөл хөтөлбөр хэрэгжүүлэх эрхтэй болж байна.

Тус төвийг байгуулахад номын сангийн үүдний хэсгийг ашиглан өргөтөж, өрөөний тоог нэмэгдүүлсэн ба иж бүрэн засвар үйлчилгээ хийж, шинээр боловсон ариун цэврийн байгууламжтай болгосноос гадна сүүлийн үеийн дэвшилтэт техник хэрэгсэл, тоног төхөөрөмжөөр бүрэн хангаж, өндөр хурдны интернэтийн үйлчилгээг хэрэглээнд ашиглаж байна.

Түүнчлэн элсэлтийн ерөнхий шалгалт болон бусад төрлийн англи хэлний шалгалт өгөхөд чухал шаардлагатай сүүлийн үеийн англи хэлний ном, сурах бичгээр бүрэн хангажээ.

Тус төвийг зорин ирсэн хэн бүхэн Америкийн соёл, мэдээллийн төвийн англи хэлний үнэ төлбөргүй сургалтуудад хамрагдах боломжтой юм.

Ийнхүү аймгийн төв номын санд хөрөнгө оруулалт хийж, орчин нөхцлийг сайжруулан илүү тухтай үйлчилгээ авах нөхцөл бүрдсэнээр Увс аймгийн Нийтийн номын санг зорьж ирэх үйлчлүүлэгчдийн тоо өдрөөс өдөрт нэмэгдэж байна.