Засгийн газар өчигдөр /2024.12.30/ ээлжит бусаар хуралдаж, зарим шийдвэрийг гаргажээ.

Тухайлбал, Эрчим хүчний сайд Б.Чойжилсүрэнг баярын өдрүүдэд амрахгүй, цахилгаан станцуудад очиж ажиллах гэнэ. Түүнд айл, өрх, ААН-үүдийн эрчим хүчийг тасалдуулахгүй, хэвийн олгоход анхаарч ажиллахыг даалгасан байна.

Эрчим хүчний сайд Б.Чойжилсүрэн аль эртнээс “Энэ өвлийн турш эрчим хүчний хязгаарлалт хийнэ” хэмээн анхааруулж, хаягаа манасан хэдий ч саяхнаас Бөөрөлжүүтийн цахилгаан станцын эхний хэсэг ашиглалтад орж, 150 МВт цахилгааныг төвийн эрчим хүчний системд нийлүүлж эхэлсэн, Багануурын 50 МВт хүчин чадалтай батарей хуримтлуурын станц төвийн системд эрчим хүч нийлүүлэх болсон.

Гэвч хүчин чадлын тохируулга хийж ажиллахгүйгээр энэ өвлийн эрчим хүчний оргил ачааллыг хэвийн авч гарахад хүндрэлтэй тул Засгийн газраас Эрчим хүчний сайдыг станцууд дээр ажиллахыг үүрэг болгосон байна.

Гэхдээ Эрчим хүчний сайд ганцаараа баярын өдрөөр ажиллахгүй. Амрахгүй ажиллах сайдын тоонд Байгаль орчин, уур амьсгалын өөрчлөлтийн сайд С.Одонтуяа, Хот байгуулалт, орон сууцжуулалтын сайд Ж.Батсуурь, Эрүүл мэндийн сайд Т.Мөнхсайхан нар багтсан байна.

Улаанбаатар хотын агаарын бохирдлыг бууруулахтай холбоотойгоор авч хэрэгжүүлэх арга хэмжээний хүрээнд сайд С.Одонтуяа, Ж.Батсуурь нар амрах эрхгүй болсон байна. Томуу, томуу төст өвчний дэгдэлт оргилдоо хүрч буй тул бэлэн байдлын өндөржүүлсэн зэрэгт ажиллахыг Эрүүл мэндийн сайд Т.Мөнхсайханд даалгажээ.