Ерөнхийлөгч 2025 оны Төсвийн тухай хууль болон хамт өргөн мэдүүлсэн хуульд бүхэлд нь хориг тавьсантай холбогдуулан Сангийн сайд Б.Жавхлан мэдээлэл /2024.11.20/ хийлээ.

Сангийн сайд Б.Жавхлан:

-Ерөнхийлөгч хориг тавьж буй талаараа мэдээлэл хийлээ. УИХ ойрын хугацаанд Ерөнхийлөгчийн хоригийг хэлэлцэж, УИХ хүлээж авах болов уу гэсэн таамаглалтай байна.  Засгийн газрын хуралдаанаар ч мөн алдагдалгүй төсөв батлах дээр санал нэгдэж байгаа. Тэвчих ёстой зарим зардлуудаа танах, нэлээдгүй үйл ажиллагааг танах шаадлагатай болж байна.

Энэ жилийн нэмэгдэж байгаа төсвийн 60-70 хувь нь хуулийн дагуу нэмэгдэж байгаа. Тухайлбал, цалин тэтгэврийн нэмэгдэл, боловсролын салбарын хуулийн нэмэгдэл гэх мэт өсч буй зардлууд дээр эргэж харах нөхцөл үүснэ. Мөн гадаад томилолтын зардал, соёлын яамны ваучер гэх мэт. Засгийн газар үйл ажиллагаа талдаа зардлыг танах шаардлагатай, УИХ ч мөн хүлээж аваад, хэлэлцэж, өөрчлөлт хийх байх.

Засгийн газрын хувьд ч эерэг хүлээж аваад, өөрчлөлтөө хийгээд явна гэж бодож байна. Ирэх жилийн төсөв 5,3 их наядаар өсөлттэй байгаагаас 2,5 их наяд нь салбар салбарын хуульд орсон өөрчлөлтөөр шууд нэмэгдэж буй зардлууд бий. Үүнийг ч бас эргэж харах, төсвийн нэг төгрөг болгоныг илүү их үр дүнтэй болгохын тулд салбар салбарын амбицыг хөндөх болов уу гэж харж, тооцоолж байна. Ер нь бол нийтдээ 1,2 их наядын таналж хийж байж, алдагдалгүй төсөв батлах боломжтой гэж харж байна.