Ерөнхийлөгч У.Хүрэлсүх Монгол Улсын 2025 оны Төсвийн тухай хуульд бүхэлд нь хориг тавьсан тухай мэдээлэл өчигдөр орой нийгмийн сүлжээнд шуугиан тарив. Гэвч нэгэнт ингэж олонхиороо хүч түрэн баталсан төсвийн хууль дээр УИХ Ерөнхийлөгчийн хоригийг хүлээж авах эсэх дээр олон хүн эргэлзэж байна.
Хуульд зааснаар Ерөнхийлөгчийн хоригийн УИХ ажлын 14 хоногийн дотор хэлэлцээх ёстой бөгөөд хуралдаанд оролцсон нийт гишүүдийн 2/3 буюу 66 хувь дэмжсэн тохиолдолд хориг хүчин төгөлдөр үлдэх юм.
Одоогоор ЕТГ-аас хоригийн талаар мэдээлэл гаргаагүй байгаа бөгөөд өнөөдөр албан ёсоор мэдээлэл хийх юм байна. Мөн төсөвт хэсэгчлэн, эсвэл бүхэлд нь хориг тавьсан эсэх ч бас албан ёсны мэдээллийн дараа тодорхой болно.
2025 оны төсвийн тухай хууль болон түүнийг дагалдан орж ирсэн хуулиудын төслийг УИХ энэ сарын 8-ны өдөр эцэслэн баталсан. Баталсан хуулийн төслийн эцсийн найруулгыг сонсох ажил өнгөрөгч баасан гаригт болсон бөгөөд даваа гаригт УИХ-ын дарга хуулийг ёсчлон баталжээ.
Үүнээс хойш ажлын тав хоногийн дотор Ерөнхийлөгч хориг тавих боломжтой. Өөрөөр хэлбэл, хориг тавих хугацаа энэ баасан гаригт дуусах ёстой. Гэвч Ерөнхийлөгч үүнийг ажлын гурван өдрөөр урагшлуулсан /өчигдрөөр тооцвол/ явдал нь олон нийтэд "Төсвийн хуульд бүхэлд нь хориг тавьсан байх" гэдэг хүлээлтийг үүсгээд байна.
Сануулахад, УИХ-аар баталсан 2025 оны Төсвийн тухай хууль батлагдсаны дараа энэ удаагийн төсөв нь хэт үрэлгэн зардалтай, эдийн засгаа унагаж болохуйц төсөв боллоо гэдэг иргэдийн шүүмжлэл дээр үндэслэн Иргэний нийгмийн байгууллагуудын зүгээс Төсвийн хуульд хориг тавьж өгөөч гэдэг хүсэлтийг Ерөнхийлөгчид хүргүүлээд байсан юм.
