УИХ -ын нэгдсэн чуулганаар Цөмийн энергийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэж байна. 

Хуулийн төслийн өөрчлөлт нь товчхондоо 2009 онд батлаад мартсан Цөмийн инергийн тухай хуулийг одоо хүчин төгөлдөр үйлчилж байгаа Ашигт малтмалын тухай хууль болон бусад хуультай нийцүүлж өөрчлөх, шинэчлэх, хөрөнгө оруулалтын орчныг тодорхой болгох зорилготой. 

Гэвч байнгын хороо болон чуулганы хуралдаан дээр гишүүдийн зүгээс ярьж байгаа зүйл нь "Шар нунтаг байгаль орчинд ямар хортой вэ", эсвэл "Шар нунтгаа ухаж гаргачихаад атомын цахилгаан станцаа барихгүй юм уу? Баялгаа алдчихаад хоосон хоцрох вий" гэдэг яриа. Тэр байтугай "Шар нунтагаа зарснаар орон нутагт ямар ашиг, ач холбогдолтой юм бэ?" гэж хүртэл асууж, Оюутолгойн гэрээний алдаа, онооны тухай ч ярьж байна.

Уг нь бол хуулиа батласны дараа хөрөнгө оруулагч нараа урьж авчирчихаад ярих ёстой асуудал. Хөрөнгө оруулалт авахын тулд хуулийн орчин нь тодорхой, тогтвортой байх ёстой. Энэ зорилгоор Цөмийн инергийн тухай хуульд өөрчлөлт оруулах гэж байгаа. Ядаж "Стратегийн ордод төрийн өмчийн хувь 34 байна, үнэ төлбөргүй шууд эзэмшинэ" гэдэг заалтыг өөрчилж, төрийн өмчийн хувь эзэмшлийг татвараар орлуулах хувилбарыг оруулж ирэх тухай ярьж байгаа. Тэр битгий хэл "Орона" гэдэг нэг компанийн асуудлыг  ч ярих ёсгүй юм. Тухайн компанийн технолои ямар байх нь манай асуудал биш. Технологи ярих гэж байгаа бол дэлхийн түвшинд хүрсэн өндөр технологи хаана байна? Ямар зарчмаар ашгаа хувааж, орлогоо бүрдүүлэх вэ? гэдгийг л ярих ёстой. Ганцхан "Орона" компани л уран олборлодог биш шүү дээ.

Эхлээд хуулиа боловсронгуй болгочих, хуулийнхаа орчинд хөрөнгө оруулагч нараа уриад оруулаад ир. Тэгсний дараа "Та нар атомын цахилгаан станцыг ингэж барина шүү" гэдэг ярих ёстой. Тэр нь манай парламент, Засгийн газрын бодлого байх ёстой. Бодлого нь тодорхой болоод хөрөнгө оруулагч нь тодорхой болчихсон байхад хуулийн асуудал нь хоцроод яваад байгаа. 

Манай улсын хувьд хамгийн тулгамдсан асуудал бол цөмийн эрчим хүчтэй болох, үүний тулд уранаа олборлох асуудал. Тэгээд энэ бүхний эхлэл нь Цөмийн инергийн тухай хуулиа өөрчлөх. Хуулийг батлах нь яаралтай асуудал боловч хэлэлцүүлэх үе шат нь хугацаа авах юм шиг байна. Тиймээс ядаж хэлэлцэж байгаа асуудлынхаа, ярьж байгаа зүйлийнхээ эрэмбэ дарааг олж яримаар байна аа, манай гишүүд. Хаана нь юу ярих ёстойгоо мэдэж ярья.

Б.ЗАЯА