Түгжрэлийг бууруулах төслийн хүрээнд өнгөрсөн оноос Хан-Уул дүүргийн 22 дугаар хороо, Зайсангийн төмөрбетон 225 метр урт гүүрийн өргөтгөл шинэчлэлийн ажил үргэлжилж байна.
Зайсан чиглэлийн /баруун тал/ төмөрбетон гүүрийн барилга угсралтын ажил 100 хувийн гүйцэтгэлтэйгээр дуусч, 2023 оны есдүгээр сард зорчих хэсгийн хөдөлгөөнийг нээсэн. Харин хот чиглэлийн төмөрбетон гүүрний 21 метр, 18 метртэй дам нуруу цутгалтын ажил бүрэн дуусаж, 25.18 метртэй дам нурууны ажил 20 хувийн гүйцэтгэлтэй үргэлжилж байна.
Тиймээс ирэх сарын 1-нээс хуучин гүүрийн хөдөлгөөний хааж, шинэ гүүрэнд хийсэн бохир усны шугамын холболтын ажлыг гүйцэтгэх аж. Үүний дараа хуучин гүүрийг буулгахаар төлөвлөжээ. Хуучин гүүрийг буулгаж, баруун талд шинээр баригдсан гүүртэй ижил гүүрийг дахин барих гэнэ.
Зайсангийн хуучин гүүр нь 1968 онд ашиглалтад орсон бөгөөд их засвар шинэчлэлтийн ажил хийж байгаагүй юм. Ашиглалтын түвшин D үнэлгээнээс доошоо орсон буюу гүүрийг зайлшгүй шинэчлэх, буулгаж дахин барих шаардлагатай болсон учраар нураах шийдвэрт хүрсэн байна.
