Японы “Цаснаас хамгаалах хашаа” төслийг хэрэгжүүлбэл автозамын салбар гэлтгүй “Тэрбум мод” үндэсний хөдөлгөөнд ч зөв зохистой ашиглах боломжтой юм байна.

Цаснаас хамгаалах хаалт хашлага нь зам дагуу тарьсан мод, суулгацыг цасан шуурга, хүчтэй салхи шуурганаас хамгаалж, хэвийн ургахыг нь дэмжих юм. Тус бүтээгдэхүүнийг ашиглан манай улсад тулгарч буй олон асуудлыг хамтран шийдэж болохыг тус төслийг санаачлагчид ЗТЯ-ны Төрийн нарийн бичгийн дарга С.Батболдтой уулзах үеэрээ тэмдэглэв.

ТНБД С.Батболд Японы бизнес эрхлэгчдийн нэг “Рикен коогёо” ХХК, Монголд хамтран бизнес эрхлэх “Монгол Эко констракшн”, “Бадрах булаг” ХХК-ийн төлөөлөлтэй уулзаж, төслийн зорилго, ач холбогдлыг сонирхон, замын эвдрэл гэмтэл, аюулгүй байдлыг бүрдүүлэхэд “Цаснаас хамгаалах хашаа”-г хэрхэн ашиглах, хамтран ажиллах талаар санал солилцжээ.

Японы Хоккайдо мужийн Riken буюу “Рикен коогёо” ХХК-ийг 1955 онд байгуулсан бөгөөд салхи, цасны хамгаалалтын хаалтыг төлөвлөлтөөс эхлээд үйлдвэрлэл, худалдаа хүртэлх шатанд хийж гүйцэтгэдэг байна. Тус хаалтыг ган хавтангийн материалаар, салхины хурд хүчийг сааруулах, замын аюулгүй байдлыг хангах, цасан шуурганаас хамгаалах, замын эвдрэл гэмтлийг багасгах зорилгоор хийжээ. Японд өвөл хэдий дулаан ч Хоккайдо, Тоохокү, Хокүрикү зэрэг цас их унадаг бүс нутагт өвлийн турш замын аюулгүй байдлыг хангахад энэхүү хамгаалалтын хашлага, хавтанг ашигладаг байна.

Төслийн багийнхан “Цаснаас хамгаалах хашаа”-г манай улсад мөн адил зам, тээврийн салбарт цаснаас хамгаалах, замын эвдрэл гэмтлийг багасгах, жолоочийн аюулгүй байдлыг хангахад ашиглах боломжтойг танилцуулаад, хашлагыг мод, ган хослуулан хийдэг учир эдэлгээ удаан, чанар сайн, монголын байгаль цаг уурын өвөрмөц байдал, авто замын зохион байгуулалт, дэд бүтцийн бодлоготой уялдуулан хөгжүүлбэл олон талын ач холбогдолтойг онцолжээ. Тухайлбал, өвлийн улиралд манай орны ихэнх нутгаар цас орж шуурснаас орон нутгийн авто замд халтиргаа гулгаа үүсэх, үзэгдэх орчин хязгаарлагдаж, олон зам, даваа хаагддаг. Тэгвэл цаснаас хамгаалах хашаа нь замыг цас, салхи шуурганаас хамгаалах технологийн шийдэл болох судалгаа шинжилгээ, туршилтыг зарим аймаг, орон нутгийн удирдлагатай хамтран хийж байгааг тус яам мэдээлжээ.