Засгийн газрын ээлжит хуралдаанаар (2024.10.09) хэлэлцсэн зарим хуулийн төслүүдийн талаар Хууль зүй дотоод хэргийн сайд О.Алтангэрэл дараах мэдээллийг хийжээ.

О.Алтангэрэл:

-Засгийн газрын хуралдаанд Авлигын эсрэг хуулийн төслийг танилцуулгыг хийлээ. Хөөн хэлэлцэх хугацаагаар, хуулийн хийдлээр, албан тушаалтнуудын эрх мэдлээс  шлатгаалж авлигачдыг шийтгэж чадалгүй өдийг хүрлээ. Оффшор дансанд байгаа хөрөнгийг хураана гэж олон жил ярьсан. Хилийн чанадад байгаа хууль бус мөнгө, хөрөнгө хэмжээг тоолно, хураана гэж ярихын оронд өөрсдийнхөө нүдэн дээр байгаа хоёр сая төгрөгийн цалинтай хэрнээ 200 сая төгрөгийн машин унадаг, гурван сая төгрөгийн орлоготой хэрнээ гурван тэрбумын үнэтэй хаусанд амьдардаг төрийн өндөр албан тушаал хашиж байсан, төрийн өмчит компанийн захирлаар ажиллаж байсан хүмүүст хариуцлага тооцох асуудал чухал байгаа.

Анхдагч хуулийн төсөл 40 гаруй зүйл 200 гаруй заалттай.  Дахиад хэлэлцүүлэг хийнэ, санал авна, УИХ-ын намрын чуулганаар амжиж хуулийн төслийг өргөн барина. Энэ хууль батлагдах юм бол хөөн хэлэлцэх хугацаа дууссан зэрэг шалтаг тайлбар сонсохгүйгээр татвар төлөөгүй, хууль ёсны орлогоо нотолж чадаагүй хууль бус хөрөнгө орлогыг хураах ёстой. 

-Авлигачдын хууль бус хөрөнгөд тооцоолол хийж үзсэн болов уу?

-Янз янзын тооцоонууд байна. Хууль бусаар хөрөнгөжсөн хүмүүстэй холбоотой хураагдсан хөрөнгө орлого сүүлийн 6 жилд 15 тэрбум орчим төгрөг төсөвт төвлөрсөн байгаа.  Гэхдээ аудитын дүгнэлт үзэхээр олон их наядын хохирол байгаад байдаг. Олон их наядын хохирол байгаа гэдгийг бид ч мэдэж байгаа. УИХ-аар  хуулийн төсөл батлагдана гэж найдаж байна. УИХ-ын гишүүдийн 80 гаруй хувь нь шинэ гишүүд, Авлигатай тэмцэх зоригтой байгаа байх. Ерөнхий сайд энэхүү хуулийн төслийг тууштай дэмжиж байгаа. Хууль батлагдаад хэрэгжээд эхэлбэл авлигаас хураагдсан хөрөнгөөр сан байгуулж, эрүүл мэнд, боловсролд зарцуулдаг болно.

Дээрээс нь авлигын мэдээлэгчийн тухай, Авлигын хуульд нэмэлт өөрчлөлт оруулах тухай хуулийн төслийг танилцуулсан. Та авлигын гэрч болсон бол таны мэдээллийг нууцлая. Нотлогдоод авлигачдаас хөрөнгө хураагдвал тухайн хөрөнгийн тодорхой хувийг мэдээлэгчид өгье гэдэг төслийг танилцууллаа.

-С.Зориг агсны амь насаа алдсан хэргээр МАН маш олон жил улс төр хийлээ. Таныг алба хашиж байх хугацаанд хэргийн мөрдөн шалгалтанд ахиц дэвшил гарах уу?

-Энэ хэрэг илрэх ёстой. Энэ хэргээс гадна төр нийгмийн зүтгэлтэн Г.Батхүү агсан бид хоёрын зогсч байгаа энэ газраас хэдхэн метрийн зайд амиа алдсан. Төр нийгмийн зүтгэлтнүүд амиа алдсан хэрэг чимээгүй яваад байж болохгүй. Хууль зүй дотоод хэргийн сайд шууд мөрдөн байцаалтын үйл ажиллагааг удирддаггүй ч Засгийн газрын зүгээс ямар дэмжлэг шаардлагатай байна, түүний төлөө ажиллана. Ерөнхий сайдаас өгсөн үүрэг ч байгаа.

Жил болгон сонгууль болохоор хэрэг ярьдаг, тэрийг улс төрийн журмаар ашигладаг. Ашиглахдаа хамтран зүтгэж явсан нөхдийнх нь эсрэг ашигладаг энэ байдлаас гарах ёстой. Эрүүгийн хэрэг бол эрүүгийн хэрэг. Хэн нэгэн алуурчин, хэн нэгэн буруутай этгээд нь тогтоогдож, хариуцлагаа хүлээх ёстой. Улс төр бол тусдаа байх ёстой. Ийм учраас энэ хэрэг дээр анхаарал хандуулж ажиллана.