Нийслэлийн Хан-Уул дүүргийн 23 дугаар хорооны нутаг дэвсгэрт бохирын ус халих явдал дахин давтагдаж байгааг тус хорооны оршин суугч мэдээлжээ. 

Иргэн:

"Хан-Уул дүүргийн 23 дугаар хорооны нутаг дэвсгэрт бохир хальж, хотын захиргааны шинэ байрны баруун талын орон сууцнууд болон 34 дүгээр сургууль руу явдаг зам, явган хүний зам, төв замаар урсаж байна. Хоёр хоногийн өмнө /2024.10.06/ бохир хальж Яармагийн төв зам дээр гол шиг урссан. Өнөөдөр бага зэрэг хатаж, дөнгөж сая хлорамин цацаад явж байна. Энэ байдал нэг биш удаа давтагдаж байна. Энэ хавьд төрийн өмчийн 34 дүгээр сургууль, 12 дугаар цэцэрлэг бий. Тус сургуульд 5000 орчим хүүхэд сурдаг. Хүүхдүүдийн ихэнх нь энэ бохир урссан замаар явдаг. Олон мянган хүүхэд, иргэд бохир үнэрлэж, баас шээсэн дээгүүр алхаж байна. Энэ чинь халдварт өвчний эх үүсвэр. Хүүхдээ гэртээ ариун цэвэр сахиулж, дархлааг нь дэмжсэн хэрнээ гадаа гараад бохир дундуур сургууль, цэцэрлэгтээ явж байна.

Уг нь Хангарди ордон дотор нийслэлийн дэд бүтэц хариуцсан инженер байх ёстой. Хотын бохирын шугам нь ачааллаа дийлэхээ больсон бол шинээр барилга барихаа болимоор байна. Хэрэв шинэ барилга барих бол дэд бүтцээ хангалттай шийдмээр байна. Эрүүл газрын хөрсөнд нэвчтэл бохир урсаж байгааг дахин давтмааргүй байна. Арга хэмжээ авч өгөөч" хэмээн хотын удирдлагуудад дамжуулсан байна.

Эх сурвалж: ikon.mn