Өнөөдөр (2024.10.07) Байгаль орчин, уур амьсгалын өөрчлөлтийн сайд С.Одонтуяад хандаж, ХУД-ийн  ИТХ-ын 6-р тойрогт нэр дэвшигчид хүсэлт хүргүүллээ.

ХУД-ийн 11, 17, 22-р хороод (10 мянга орчим өрх)-ын нутаг дэвсгэрийн дунд ганцхан улсын сургууль байдаг. Сүүлийн үед тус дүүрэг, хороодын нутагт орон сууцны шинэ хорооллууд ихээр баригдаж, үүнээс үүдсэн сургууль, цэцэрлэгийн хүртээмжгүй байдлаас хүүхдүүдийн сурч боловсрох эрх зөрчигдөж, ямар ч сонголтгүйгээр өөр дүүрэгт байрлах цэцэрлэг, сургуульд хамрагдаж байна.

Тэгвэл энэ асуудлыг тодорхой хэмжээгээр шийдэх шийдэлдээ дэмжлэг авч, ХУД-ийн 11-р хорооны нутаг дэвсгэр 960 хүүхдийн сургууль, 250 хүүхдийн цэцэрлэгийн цогцолбор барих газрын асуудлыг шийдүүлэх хүсэлтээ ХУД-ийн ИТХ-ын сонгуулийн 6-р тойрогт нэр дэвшигч С.Түвшинжаргал, Ж.Бямбасүрэн, Б.Арсланбаатар, М.Энхсанаа, Л.Оюунбилэг нар Байгаль орчин, уур амьсгалын өөрчлөлтийн сайд С.Одонтуяад хүргүүллээ.

Томчууд бидний хариуцлагагүй, зохион байгуулалтгүй, шийдэл шийдвэргүйн хариуцлагыг өдөр бүр өөрсдийн биеэр амсаж хүүхдүүд хичээлдээ явахдаа өдөрт олон цагийг замын түгжрэлд өнгөрүүлж, инээж тоглох, суралцах, хөгжих цаг хугацаа, боломжоо алдаж хохирсоор байна. Үүгээр зогсохгүй хүүхдээ өдөр тутам харгалзан дэмжиж, сургах зорилгоор нэг асран хамгаалагч ажил хийхгүйгээр бүхий л цагаа зөвхөн хүүхдэдээ зориулахад хүрч байна. Үүнийг дагаад өрхийн санхүү, эдийн засагт ч багагүй дарамт учирч байгаа нь тодорхой.

Газрын асуудал шийдэгдсэнээр тухайн хороодод амьдарч байгаа мянга мянган хүүхэд хамран суралцах тойрогтоо сурч боловсрох боломж, сонголтоор хангагдаад зогсохгүй тэр орчмын замын түгжрэл саарч, дээр дурдсан нийгмийн олон асуудалд эерэг өөрчлөлт авчирна гэж тэд үзэж байгаагаа уулзалтын үеэр онцоллоо.