1937 оноос эхтэй улс төрийн болон сэхээтнүүдийн хэлмэгдэлд өртсөн олон мянган хүний гэгээн дурсгалыг хүндэтгэх өдрийг УИХ-ын 1996 оны 33 дугаар тогтоолоор жил бүрийн есдүгээр сарын 10-нд тэмдэглэн өнгөрүүлж байна. 

Баянхонгор аймгийн хэмжээнд хэлмэгдэлтийн шуурганд 30 гаруй сүм хийдэд шавилан сууж байсан 600 гаруй иргэн өртсөн болох нь бүртгэгдсэн байдаг. Хэлмэгдэгсдийн гэгээн дурсгалд зориулан Баянхонгор аймгийн Хөгжимт драмын театрын урд цэцэрлэгт хүрээлэнд 10 гаруй жилийн өмнө "Хэлмэгдэгсдийн хөшөө"-г босгосон байдаг. "Өндөг шиг өөгүй хүмүүсийг "том гараар" нугачин дарж байсныг өгүүлэхийг зорьсон" хэмээн хөшөөг урлаач нь хэлж байсан түүхтэй.

Хэлмэгдэгсдийн дурсгалыг хүндэтгэх өдрийн хүрээнд аймгийн ИТХ, түүний ажлын албанаас ЕБС-иудтай хамтран сурагчдад хэлмэгдлийн хор уршгийн талаар лекц хичээл орж, шашин номын байгууллагууд буяны ном хурж, замын хөдөлгөөнд оролцож буй автомашинууд ойрын гэрлээ асааж хүндэтгэл үзүүлж байна.

Дуулгахад, Улс төрийн хэлмэгдэгсдийн дурсгалын өдрийг хүндэтгэн өнгөрүүлэх тухай Цагаатгах ажлыг удирдан зохион байгуулах улсын комиссын даргын 2022 оны наймдугаар сарын 21-ний 10 тоот захирамжийн дагуу Баянхонгор аймгийн Түүх угсаатны зүй, байгалийн түүхийн музейд “Улс төрийн хэлмэгдэгсдийн хүндэтгэлийн булан”-г нээжээ. Музейгээс улс төрийн хэлмэгдэгсэдтэй холбогдолтой эд өлгийн зүйлс, архивын баримт материалаар сан хөмрөгөө баяжуулах ажлыг зохион байгуулж байгаа юм байна.