АНУ-ын ерөнхийлөгчийн сонгуулийн нэр дэвшигчид болох Камала Харрис, Дональд Трамп нар ирэх сард олон нийтийн өмнө мэтгэлцэхээр төлөвлөөд байгаа.

Тэгвэл мэтгэлцээний үеэр микрофоныг яаж тохируулах асуудлаар талуудын хооронд маргаан дэгджээ.

Мэтгэлцээн есдүгээр сарын 10-ны өдөр ABC телевизийн сувгаар нийтэд цацагдах юм.

Ням гарагт Трамп тэнцвэртэй нийтлэлийн бодлогогүй ABC сувгаар мэтгэлцэх нь зөв эсэхэд эргэлзэж байгаагаа сошиал хуудсаар илэрхийлж байв.

Харин Даваа гарагт талуудын хооронд микрофонтой холбоотой шинэ маргаан дэгджээ.

Нэр дэвшигчийн ярих ээлж болоогүй байхад микрофоныг нь унтраах дүрмийг ABC анх танилцуулсан юм.

Гэтэл Харрисын талынхан энэ дүрмийг өөрчилж, микрофоныг асаалттай байлгахыг зохион байгуулагчдаас шаарджээ. Микрофоныг унтраах нь ам сул, тэвчээргүй Трампыг олон нийтэд сул талаа харуулахаас хамгаалсан хэрэг болно гэж тэд үзэж байна.

“Бид нэр дэвшигчдийн микрофоныг нэвтрүүлгийн турш нээлттэй байх ёстой гэж үзэж байна. Трампынхан нэр дэвшигч нь 90 минутын турш ерөнхийлөгч шиг биеэ авч явж чадахгүй гэж боддог учраас микрофоныг унтраахыг хүсэж байна” гэж Харрисын олон нийттэй харилцах албаны захирал Брайан Фэллон мэдэгджээ.

Зургаадугаар сарын 27-нд CNN сувгаар Трамп, Байден нарын хооронд явагдсан анхны мэтгэлцээний үеэр  ярих ээлж нь болоогүй нэр дэвшигчийн микрофоныг унтрааж байсан юм.

Жо Байден энэ нөхцөлийг санаачилсан бөгөөд ирэх сарын мэтгэлцээнд ABC суваг үүнийг хэвээр хадгалахаар төлөвлөж байжээ.

Гэтэл Байдены оронд нэр дэвшсэн Харрис уг дүрмийг өөрчлөхийг хүссэн байна.

Ингэх нь тэвчээргүй Трампыг олон нийтэд “муухай харагдуулна” гэж тооцсон бололтой. Сүүлийн үед Трамп өрсөлдөгчөө элдвээр дайрах нь хэрээс хэтэрч, штабынхан нь зогсоож дийлэхгүй байгаа гэсэн мэдээлэл бий.

Трамп өөрөө Харрисын саналд татгалзахгүй гэсэн байр суурь илэрхийлсэн нь түүний сонгуулийн албаныхныг хүнд байдалд оруулаад байна.

“Энэ надад хамаатай эсэхийг би хэлж мэдэхгүй байна. Микрофоныг асаалттай байлгасан нь дээр байх. Өмнөх мэтгэлцээний нөхцөлөөр бол унтраалттай байх ёстой” гэж тэр өчигдөр NBC сувгаар ярьжээ.

Энэ үеэр тэр зангаа тавилгүй Харрисыг “ухаалаг биш хүн”, “надтай мэтгэлцэхээс айж байна” гэх зэргээр муулсан юм.

Өмнөх мэтгэлцээнд Байден маш тааруу үр дүнтэй оролцсон нь Ардчилсан Намаас АНУ-ын ерөнхийлөгчийн сонгуульд нэр дэвших сунгаанаас нэрээ татаж, өмнөөсөө дэд ерөнхийлөгч Камала Харрисын нэрийг дэвшүүлэх гол шалтгаан болж байв.

Олон нийтийн санал асуулгаар Трампаас ялимгүй илүү үзүүлэлттэй яваа Харрис энэ мэтгэлцээнээр нэр хүндээ хадгалах, цаашлаад улам өсгөх төлөвлөгөөтэй байна.

Эх сурвалж: AFP