Гэрэл зургийг МРА агентлаг

Оманы Султант Улсын Гадаад хэргийн сайд Сайид Бадр бин Хамад бин Хамууд Аль-Бусайди Монгол Улсад албан ёсны айлчлал хийж байна. 

Хоёр улсын Гадаад харилцааны сайд нар өнөөдөр /2024.08.26/ мэдээлэл өглөө.

Оманы Султант Улсын Гадаад хэргийн сайд Сайид Бадр бин Хамад бин Хамууд Аль-Бусайди: 

-"Бидний яриа хэлэлцээ үр дүнтэй, нөхөрсөг, элгэмсэг дотно болсон нь манай хоёр орны хамтын ажиллагааг олон салбарт хөгжүүлэх нийтлэг хүсэл эрмэлзэл дээр тодорхойлогдлоо.

Уулзалтын хүрээнд Гадаад Харилцааны Яам хоорондын харилцан ойлголцлын санамж бичигт гарын үсэг зурлаа. Энэхүү санамж бичиг нь бидний яриа хэлэлцээ тогтмол, үр дүнтэй хөгжихийг баталгаажуулж, дипломат харилцаагаа бэхжүүлэх чухал алхам болж байгааг цохон тэмдэглэж байна.

Бид бүс нутаг, олон улсын асуудлаар санал солилцож, хамтын ажиллагааны бүх салбарт ахиц дэвшил гаргах боломж байгаад баяртай байна. Түүнчлэн нийтлэг сорилтуудыг даван туулах, байгаа боломжуудыг ашиглахын тулд үргэлжлүүлэн ажиллах нь чухал гэдэгт санал нэгдлээ.

Манай хоёр орны худалдаа, хөрөнгө оруулалт, хөдөө аж ахуй, уул уурхай, соёл, технологи зэрэг бүх салбарт хамтын ажиллагааг бэхжүүлж, үргэлжлүүлэн хөгжүүлэх хүсэл эрмэлзэлтэй байгаагаа илэрхийлэхэд таатай байна. Эдгээр салбарт хамтарч ажиллах асар их боломж байгаа бөгөөд хамтын ажиллагаагаа хоёр улсад харилцан ашигтай, бодит үр дүнд хүрнэ гэдэгт итгэлтэй байна.

Түүнчлэн бид бүс нутагтаа төдийгүй дэлхийн хэмжээнд энх тайван, тогтвортой байдал, тогтвортой хөгжлийн төлөө хамтран ажиллахаа дахин нотоллоо. Эдгээр үнэт зүйлсийг сурталчлахад хүн бүрийн хүчин чармайлт гаргахын чухлыг онцолж, олон талт хүрээнд хамтын ажиллагаагаа үргэлжлүүлэхээр тохиролцлоо.

Бидний харилцаа бие биеэ хүндэтгэх, ойлголцох, ирээдүйн талаар нэгдсэн алсын хараатай байх үндсэн дээр тогтсон бөгөөд энэ нь ирэх жилүүдэд улам хөгжин дэвжинэ гэдэгт итгэлтэй байна" хэмээн мэдээллээ.