2024-2025 оны хичээлийн жилийн бэлтгэлийн талаар Боловсролын сайд П.Наранбаяр танилцууллаа.
Энэ хичээлийн жилд 2-5 насны 142,150 хүүхэд цэцэрлэгт суралцана. Нийслэлд цэцэрлэгийн бүртгэлийн нэгдүгээр шатанд 103,999 хүүхэд цахимаар хүсэлтээ илгээж, хариуг 19-21-нд эцэг эх, асран хамгаалагчийнх нь утсанд илгээж байна. Хоёрдугаар шатны цахим бүртгэл есдүгээр сарын 5-15-нд цахимаар үргэлжилнэ.
Боловсролын сайд П.Наранбаяр:
-"Хүсэлт гаргасан хүүхэд бүрийг цэцэрлэгт хамруулна. Энэ жил 11,768 хүүхдийн хүч чадалтай 368 бүлэг бүхий 94 байрыг сургалтын зориулалтаар түрээслэхээр шийдвэр гаргаад байна.
Хамран сургах тойргоо тогтоолгосон хувийн хэвшлийн 274 цэцэрлэгт 15,000 хүүхдийг хувьсах зардлыг нь төрөөс даана.
Нийслэлийн ерөнхий боловсролын 36 сургуулийн 560 бүлгийн 23,188 хүүхэд гурван ээлжид орох эрсдэлтэй байгаа. Иймд 29 сургуульд нэмэлтээр сургалтын зориулалтаар байр түрээслэхээр ярьж байна. 22 сургуулийн байрыг шийдвэрлэсэн, 15,955 хүүхэд суралцах боломжтой" гэв.
Ерөнхий боловсролын сургуулийн нэгдүгээр ангийн хүүхдүүдийн бүртгэл энэ сарын 12-25-нд үргэлжилнэ.
