ИЗНН-аас УИХ-д сонгогдсон М.Нарантуяа гишүүнд ёс зүйн хариуцлага тооцуулах хүсэлтийг УИХ-ын Тамгын газраас УИХ-ын Ёс зүй, дэгийн байнгын хороонд гаргажээ.

Албан бичигт дурдсанаар "2024 оны наймдугаар 18-ны өдөр УИХ-ын гишүүн М.Нарантуяа нь олон нийтийн сүлжээнд өөрийн цахим хуудсаар шууд дамжуулалт хийж бараа сурталчилсан. Энэ нь гишүүний үүрэгт ажилд хамаарахгүй ажил эрхэлж, ёс зүйн хэмжээг зөрчсөн үйлдэл хэмээн олон нийтийн зүгээс шүүмжилж байна. 

Түүнчлэн М.Нарантуяа нь УИХ-ын гишүүний тангараг өргөснөөсөө хойш удаа дараа шууд дамжуулалт хийн бараа сурталчилсан тул УИХ-ын Тамгын газрын нарийн бичгийн дарга Б.Баасандорж долдугаар сарын 31-ний өдөр түүний албан өрөөнд очиж уулзан, гишүүний хавсран гүйцэтгэж болох ажил, хориглосон үйл ажиллагааны талаар танилцуулж, мэдээлэл өгсөн. 

Мөн "Монгол Улсын Их Хурлын гишүүн албаны болон хувийн журмаар гадаад улс руу явахдаа ажлын таваас доошгүй өдрийн өмнө УИХ-д даргад мэдэгдэнэ" гэдэг заалт бүхий журам бий. Гэтэл гишүүн М.Нарантуяа ямар нэгэн хүсэлт гаргалгүйгээр БНХАУ-д зорчиж, олон нийтийн сүлжээн дэх хаягаар сурталчилгаа явуулжээ. Улмаар наймдугаар сарын 16, 19-ний өдрүүдийн чуулганы нэгдсэн хуралдаанд оролцоогүй байна. 

Иймд холбогдох арга хэмжээг авна уу" гэсэн байна.