2024 оны УИХ-ын ээлжит сонгуульд ялсан нэр дэвшигчдэд СЕХ өнөөдөр Төрийн ордонд УИХ-ын гишүүний үнэмлэх гардууллаа. Энэ үеэр УИХ-ын зарим  гишүүд хамтарсан Засгийн газар байгуулах асуудлаар байр сууриа илэрхийллээ. 

МАН-аас Засгийн газарт хамтрах урилга өгсөн. АН засагт хамтарвал шинэ "МАНАН" үүснэ

УИХ-ын гишүүн Ч.Лодойсамбуу:

-"Бид 2004-2016 онд хамтарч ирсэн туршлагатай. Үр дүнд нь МАНАН гэх ойлголт үүссэн. Хамтарч хулгай, авлигын схем хийсэн. Өнгөрсөн чуулганы үед сонсгол хийж, "би", "чи" дээрээ тулсан. Тиймээс би хувьдаа шинэ "МАНАН"-г үүсгэж болохгүй гэсэн байр суурьтай байна. Асуудлыг хоёр талаас нь харж байгаа. Эхнийх нь төрийн ажил талаасаа улс төрийн нам ямар нэг байдлаар эрх мэдэл авч, өөрсдийн мөрийн хөтөлбөр бодлогоо хэрэгжүүлэхээр сонгууль хийдэг. Эвсэж, хамтраад явбал ямар ч хариуцлага хяналтгүй Засгийн газар болно. Ер нь манай өнөөдрийн байдлаар засаглалын хэлбэр тодорхойгүй байгаа. Парламентын засаглалтай гэж хууль дээр байгаа боловч Ерөнхий сайдын засаглалтай. Улс төржихгүйгээр гол ажлуудаа явуулъя гэдэг шалтгаан хэлж байгаа. Өөр намтай битгий хэл өөрсдөө дангаараа найман жил засаглахдаа юу ч хийгээгүй. Үүнийг сонгуулиар бид зөндөө ярьсан. 

Одоохондоо саналын түвшинд МАН-аас хамтрах урилга өгсөн. Манай нам дотроо ярилцах байх. Хамгийн түрүүнд Засгийн газрын бүрэлдэхүүнийг ярилцах ёстой. Засгийн газрыг хэрхэн цомхон, мэргэжлийн түвшинд аваачих, төсвийн зардлаа яаж багасгах, хамтраад ямар ажил хийх гэж байгаа зорилгоо тодорхой болгох ёстой. 

Зорилгогүй нийлнэ гэдэг нь шинэ "МАНАН"-г хийе гэсэн санал байна. Санаа амар дахиад дөрвөн жил явъя санаархал байна. Ийм байж болохгүй.

АН сөрөг хүчнийхээ үүргийг гүйцэтгэнэ

УИХ-ын гишүүн Б.Пүрэвдорж:

-Бид энэ удаагийн УИХ-ын сонгуулийн үр дүнд хоорондоо ярилцах ёстой. Хамтарсан засагт нэгдэх асуудал савнаасаа хальж байна. Манай Ардчилсан нам бол дарга шийддэг нам биш. Манай нам Үндэсний бодлогын хороогоороо асуудлаа шийддэг. Өнгөрсөн сонгуулиар болсон үр дүнг ярилцаж, цаашдаа хамтарсан засагт орох тухай ярина. Монголын ард түмэн ус, тосоор нь ялгаж өгсөн.

Эрх баригчид өнгөрсөн найман жилийн турш хийсэн ажилгүй, хулгай хийсэн. Тийм учраас эрх баригчдад хатуу хяналт тавих, сөрөг хүчнийхээ үүргийг биелүүлэх сонголтыг бидэнд хийж өгсөн. Тийм учраас сөрөг хүчнийхээ үүргийг биелүүлнэ. Сөрөг хүчин гээд эсэргүүцэхийн нэр биш. Томоохон бүтээн байгуулалт, бодлогын шийдлийн асуудал дээр хамтран дэмжээд явах боломжтой. Харин болохгүй бүхэн дээр ард түмнийхээ дуу хоолой нь болж явах ёстой гэв.