УИХ-ын сонгуулийн санал хураалт орон даяар үргэлжилж байна. Санал хураалтын үеэр гарсан, Сонгуулийн хууль тогтоомж зөрчсөн асуудлаар АН-ын Хэрэг эрхлэх газраас мэдээлэл хийлээ. 

АН-ын ХЭГ-ын дарга Н.Лхагвадорж:

-Саналаа өгөхөөр хэсгийн хороон дээр ирж байгаа сонгогчдыг МАН тусгай апп ашиглан бүртгэж байна. Энэ нь хууль зөрчсөн эсэх талаар бид хүсэлт гаргаад тодруулж байна.

Мөнгө тараах явдал хавтгайдаа байна.

Хэсгийн хорооны ажилтан, төрийн алба хаагчид саналаа өгөхөөр ирсэн сонгогч нарт зөвлөгөө өгөх нэрээр МАН-ын намын нэр дэвшигчдийг дугуйлахыг албадаж байна.

Ажиглагч нарыг бичлэг хийхийг хориглож байна. Хэсгийн хороонд ажиллаж байгаа ажиглагч нар гарсан зөрчлийг баримтжуулах, бичлэг хийх эрх нь нээлттэй. Хуулиар хориглоогүй. 

УИХ-ын 4-р тойрог, Хөвсгөл аймагт бүх хэсгийн хороод дээр МАН-ын хоёр нэр дэвшигчийг заавал дугуйлах зааварчилгаа гаргаад, хэвлээд тавьчихсан байна. Төрийн алба хаагчид сонгуулийн хууль тогтоомж зөрчиж, улс төрийн намд үйлчилж байна. Хөвсгөл аймгийн Цагдаагийн хэлтэст гомдол гаргаад, шалгуулж байна.

Орхон аймаг дахь Зэвсэгт хүчний 186, 111-р ангийн байлдагч, хугацаат цэргийн алба хаагч нарт МАН-ын найман нэр дэвшигчийг дугуйлахаар нэрсийн жагсаалтыг өгсөн байна. Саналын хуудас бөглөхдөө нэрсийн жагсаалтыг гаргаж ирж байгаад ажиглагч нарын хараанд өртөж, уг хэргийг мөн Орхон аймгийн цагдаагийн хэлтэс шалгаж байна.

Төрийн албаны цэнхэр дугаартай машин сонгуулийн сурталчилгаанд явж байна. Түргэн тусламжийн тэргэнд цагаан хоолой байрлуулаад намын сурталчилгаа хийж байна. 20 сая төгрөгөөр торгосон байна. 

Дорнод аймгийн Баян-Уул сумын 5-р багт н.Отгонжаргал гэдэг эмэгтэй зөөврийн хайрцгаас гарсан хүчингүй саналын хуудсыг сольж, шинэ хуудас бөглөж хийсэн нь илэрч мөн цагдаагийн байгууллагад шалгагдаж байна. Саналын хайрцагны лац хөндсөн 10 гаруй зөрчил илэрсэн байна.

Энэ бүх зөрчлийг "төрийн эрхийг хууль бусаар авах гэсэн оролдлого" хэмээн үзэж хуулийн байгууллагаар шалгуулна. Зөрчил гаргасан, мөнгө тараасан нэр дэвшигчийг орой 18.00 цагийн мэдээгээр нэрийг нь зарлана" гэв.

Мөн тус намын тойрог хариуцсан хуулийн ажилтны мэдээлснээр Өмнөговь аймагт АН-аас нэр дэвшсэн Л.Мөнхбаясгалангийн машин, байрыг нэгжсэн тохиолдол гарчээ. Хуульд зааснаар нэр дэвшигчийг шалгах, байр, машинд үзлэг нэгжлэг хийхээр СЕХ-нд мэдэгдэх үүрэгтэй юм байна. 

Мөн Өвөрхангай аймагт үнэгүй бараа өгнө гэж иргэдийн иргэний үнэмлэхийг авч явсан зөрчил гарсан байна.

Чингэлтэйд нэр дэвшсэн н.Даваажав гэх нэр дэвшигч өөрийн эзэмшлийн скүүтерийг хэсгийн хороодод олноор байршуулж, иргэдэд үнэгүй үйлчилгээ үзүүлсэн зөрчил гарчээ.