Жил гаруйн өмнө титмээ зүүсэн Их Британийн хаан Чарльзын анхны албан ёсны хөргийг Букингэмийн ордон өнгөрсөн сард нийтэд танилцуулж байсан юм.

Тэгвэл өчигдөр буюу Мягмар гарагт хоёр идэвхтэн малын фермүүдэд амьтны эрх зөрчигдөж буйг эсэргүүцэх зорилгоор Лондон хотын "Philip Mould" галерейд байрладаг уг хөрөгт халджээ.

Ингэхдээ хааны нүүрэн дээр “Wallace and Gromit” энимэйшн киноны гол дүр Уоллосын дүрсийг наасан байна.

Бас “Бяслаг хэрэггүй, Громит. RSPCA фермүүдэд явагдаж буй энэ бүх харгислалыг хараач!” гэсэн өгүүлбэрийг Уоллос хэлж байгаа дүрслэлийг хөрөг дээр наажээ.

RSPCA нь амьтны эрхийг хамгаалах сан бөгөөд Чарльз хаан нэг ивээн тэтгэгч нь юм байна. Тус сангаас өндөр стандарт хангасан малын фермүүдэд “Assured” хэмээх чанарын тэмдэг олгодог юм.

Уг халдлагыг Animal Rising амьтны эрхийг хамгаалах хөдөлгөөний хоёр гишүүн үйлджээ. Тус хөдөлгөөнөөс гаргасан мэдэгдэлд “Assured” тэмдэг хүртсэн фермүүдэд үйлдэгдэж буй харгислалыг ийм замаар хааны анхаарлын төвд оруулахаас өөр арга олдоогүйг тайлбарласан байна.

Мөн хөрөгт гэмтэл учруулалгүйгээр наалтыг амархан салгах боломжтойг мэдэгдэлдээ дурджээ.

Их Британид сүүлийн үед янз бүрийн идэвхтнүүд урлагийн бүтээлд халдах явдал тасрахгүй байгаа.

Өнгөрсөн сард Британийн номын санд хадгалагддаг “Магна Карта” хэмээх түүхэн эх бичгийн шилэн хоргыг уур амьсгалын өөрчлөлтийн эсрэг тэмцэгчид хагалахыг оролдож байв.

Аравдугаар сард Лондоны Үндэсний Галерейд хадгалагддаг Винсент Ван Гогийн “Наранцэцэгс” уран зураг руу идэвхтнүүд зутан шөл цацаж байжээ.

Тод улаан өнгө давамгайлсан хаан Чарльзын анхны хөрөг нь зураач Жонатан Йеогийн бүтээл юм. Хөргийг зурахдаа хаад язгууртнуудын хөргийг бүтээдэг уламжлалт арга барилаас татгалзсан нь нэлээд шүүмжлүүлээд байгаа.

Эх сурвалж: Reuters