Цахим хөгжил, харилцаа холбооны яам Дархан-Уул аймагт арван төрлийн багц системийг нэвтрүүлж байна. Төслийн хүрээнд хэрэгжүүлж буй цахим шилжилтийг эрчимжүүлэх ажлын нэг нь автозамын шалган нэвтрүүлэх хэсэгт дугаар таних төхөөрөмж суурилууллаа.
Тодруулбал Дархан-Уул аймгаас Сэлэнгэ аймаг руу чиглэсэн автозамын шалган нэвтрүүлэх Түшиг хангайн 141 дүгээр хэсэгт уг төхөөрөмжийг ажиллуулж байна.
Хоёр ширхэг автомат хаалт, хоёр ширхэг дугаар танигч камер, дагалдах компьютер зэргийг суурилуулж, гараар мөнгө хураадаг байдлыг автомат болгожээ.
Ингэснээр Дархан-Уул аймаг руу орох, гарах чиглэлийн хөдөлгөөнийг хянах, бүх төрлийн нэвтрэлттэй холбоотой тоон мэдээлэл, статистик гаргах, тээврийн хэрэгслийн татвар болон оношилгооны мэдээллийг эрх бүхий байгууллага хянах боломжтой болж байна.
Түүнчлэн төслийн хүрээнд хүнд даацын автомашинуудад төв зам ашиглалтын зөвшөөрлийг цахимаар өгөх боломжийг бүрдүүлж байна. Цаг, хугацаа хэмнэх, дараалал үүсгэхгүйгээр зөвшөөрлөө ямар ч байршлаас цахимаар авч болох юм.
Цаашид Дархан хотын инженерийн дэд бүтцийн нэгдсэн систем, хог тээвэрлэлт, яаралтай түргэн тусламж, цагдаа болон ОБГ-ыг шуурхай удирдлагын нэгдсэн системтэй холбож, иргэдэд гар утасны аппликейшныг нэвтрүүлэх ажээ.
