УИХ-ын чуулганы үдээс өмнөх хуралдаанаар "Ахмад настны тухай хуульд нэмэлт, өөрчлөлт оруулах тухай" хуулийн төслийн анхны хэлэлцүүлгийг хийлээ. 

Уг хуулийн төсөлд "Ахмад настнуудыг хөдөлмөрийн гэрээгээр ажиллуулах", "хүчээр тэтгэвэрт гаргахыг хориглох", мөн "ахмад настныг асрахад хувийн хэвшлийг татан оруулах, хамтран ажиллах" зэрэг заалтуудыг тусгасан байна. Энэ талаар хуулийн төслийн Ажлын хэсгийн дарга, УИХ-ын гишүүн Д.Сарангэрэл:

-“Өнөөдрийн байдлаар 300 гаруй өндөр настан Батсүмбэр дэх ахмадын асрамжийн газарт асруулж байгаа. Гэтэл хэрэгцээ маш их байгаа. Тийм учраас хувийн хэвшил ахмад настныг асрах үйл ажиллагаанд хөрөнгө оруулалт хийх, хамтрах, үүнийхээ хүрээнд дэмжлэг авах тухай заалтуудыг оруулсан нь энэ хуулийн төслийн том давуу тал юм.

Мөн ахмад настнуудыг хөдөлмөрийн гэрээгээр ажиллуулах асуудлыг тусгасан. Түүнчлэн тухайн иргэн 65 нас хүрээгүй байхад нь хүчээр тэтгэвэрт гаргах асуудлыг хуулиар хориглосон. Хөдөлмөрийн гэрээгээр ажиллаж байгаа иргэд цалингаа сараар, өдрөөр, цагаар авах уу гэдэг шийдлийг нээлттэй заасан" гэлээ.