“УИХ-ын Сонгуулийн саналын хуудас”-ны асуудлаар улс төрийн намын төлөөллүүд өнөөдөр Төрийн ордонд мэдээлэл хийлээ.  

УИХ-ын гишүүн, ХҮН намын дарга Т.Доржханд:

-"Нэр бүхий долоон намын төлөөлөл нэгдээд СЕХ-нд шаардлага хүргүүлж байна. Шаардлага нь үндсэн хоёр агуулгатай. 

Энэ удаад сүүлийн 30 жилийн хугацаанд өрнөөгүй онцлогтой сонгууль болно. Үндсэн хуулийн нэмэлт өөрчлөлтийн хүрээнд парламентын 126 гишүүнийг сонгоно. 

Тодруулбал, тойргоос 78 гишүүнийг, жагсаалтаар буюу намын нэр дугуйлах байдлаар 48 гишүүнийг сонгох учиртай. Үр дүнд нь Монгол Улсад олон тооны солонгорсон парламент үүсэх хүлээлттэй байгаа.

Нэг нам хязгааргүй эрхтэй бус, олон сөрөг хүчин бий болно. Ингэснээр эргээд Засгийн газарт хяналт тавьж, хоорондоо бодлогын мэтгэлцээн өрнүүлж чадахуйц эрүүл, амьд парламент үүснэ. Үүнийг хэрэгжүүлэхийн тулд СЕХ-ноос зайлшгүй анхаарах ёстой асуудлууд байна. 

Зургаадугаар сарын 28-нд сонгууль зохион байгуулагдах үед саналын хуудасны асуудал давхар яригдана. Саналын хуудас нь хоёр тусдаа байх ёстой хэмээн үзэж байна. Өөрөөр хэлбэл 78 тойргоос нэр дэвшигч нар нэг хуудас дээр тусдаа, жагсаалтаар нэр дэвших хүмүүс нь өөр хуудас дээр тусдаа 48 нэр бүхий жагсаалт байна. Нэг хуудсан дээр хэвлэсэн тохиолдолд тойргийн сонгууль, намын жагсаалт хоёр хоёулаа хүчингүй болох магадлалтай. 

Энэ удаагийн сонгуульд гадаадад байгаа монголчууд оролцоно. Гадаадад байгаа монгол иргэд зөвхөн жагсаалтын намын нэрсийг дугуйлах байдлаар сонгуульд орно.

Дээр дурдсан хоёр үндэслэлээр сонгуулийн хуудсан дээрх хоёр төрлийн санал хураалт нь тусдаа байх ёстой гэх шаардлагыг албан ёсоор СЕХ-нд хүргүүлж байна.

Өмнөх долдугаар сарын 1-ний хар үйл явдал болохгүй байхаас зайлсхийх ёстой. Гарч ирсэн Монгол Улсын парламент, Засгийн газар нь чанартай, үр дүнд нь Монгол Улс ардчиллаа баталгаажуулсан сонгууль байх нь зүйтэй. 

Дараагийн асуудал нь сонгуулийн саналын хуудсан дээр нэр бүхий намын нэрсийг дээд шүүхийн дарааллаар дугаарлачихдаг.

Сонгуульд 30 орчим улс төрийн нам болон эвсэл оролцоно хэмээн мөрийн хөтөлбөрөө Үндэсний Аудитын Газарт хүргүүлсэн байгаа. Энэ долоо хоногтоо багтаагаад Сонгуулийн Ерөнхий Хороонд хүсэлтээ өгөх ёстой юм. Сонгуулийн тойрог томорчихсон болохоор нэг тойргоос 10 хүртэл нэрс дугуйлах 10 мандаттай маш урт жагсаалт гарч ирээд буй. 

Энэ урт жагсаалт дотор иргэд төөрөх, будилах, үл ойлголцол үүсэх асуудал тулгарч мэднэ. Ийм болохоор иргэдэд энгийн, ойлгомжтой мэдээлэл өгөх зорилгоор тодорхой болгоё. Тухайлбал

• Нам, эвслийн урд талд дугаар
• Намын нэр
• Тухайн намын дарга нь хэн бэ гэдэг мэдээлэл
• Нэрсийг зурагтай нь хамт
• Намынх нь лого,
• Нам, эвслийн бэлгэдэл зэргийг тавья. 

Ингэж маш тодорхой, энгийн байдлаар иргэдэд ойлгомжтойгоор хүргэхгүй бол төөрч, будилах гээд байна". 

"Сонгууль болгоны өмнө Сонгуулийн тухай хуулийг өөрчилдөг"

Монголын Үндэсний Ардчилсан Намын дэд дарга Б.Цогтгэрэл: 

-"Сонгууль хаяанд ирлээ. Сонгогчдын хувьд сонгуульд саналаа өгөхөд маш ойлгомжтой байх ёстой. Харамсалтай нь сонгууль болгоны өмнө Сонгуулийн тухай хуулийг өөрчилдөг. Улмаар иргэдийн дунд маш их төөрөгдөл үүсдэг. Тиймээс төөрөгдөл, будилаан багатай байлгахын тулд өнөөдөр улс төрийн намууд нийлээд шаардлага, саналыг гаргаж байгаа юм.

Улс төрийн намыг жагсаалтаар дэвшүүлж байгаа тухайн санал өгөх хуудсанд 

• Намынх нь нэр
• Намынх нь үзэл санаа
• Бодлого философийг агуулсан бэлгэдэл лого
• Нам эвслийг тэргүүлж байгаа хүмүүсийн нэр тодорхой байх ёстой" гэв.