Эмийн үнийн өсөлтийн шалтгаан, нөхцөлийг хянан шалгах Түр хорооны нотлох баримтыг шинжлэн судлах сонсголоор Хөнгөлөлттэй олгож буй эмийн журамтай холбоотой мэдээлэлтэй танилцлаа. 

УИХ-ын гишүүн Ц.Сандаг-Очир:

-Цаашдаа эрүүл мэндийн даатгалын сангийн төсвийг нэмэгдүүлээд явах уу? ЭМДҮЗ-ийн гишүүд ямар журам, шалтгаанаар ажилладаг вэ. Зөвлөлийн гишүүд ямар урамшуулал авдаг вэ?

Эрүүл мэндийн дэд сайд С.Энхболд: 

-Эрүүл мэндийн салбар 2021 оноос эхэлж гүйцэтгэлийн санхүүжилтэд шилжсэн. ЭМДҮЗ-ийн тогтоолтой уялдуулж тарифын өөрчлөлтийг хийдэг. Хөнгөлөлттэй эмийн үнийн тарифыг жил бүр нэмж байна. Гэхдээ байнга нэмээд бай гэсэн үг биш. Өнөөгийн нөхцөл байдалд хөнгөлөлттэй эмийн олгож буй тоо нэмэгдэж байгаа. Энэ нь нийгэмд архаг суурь өвчлөл өндөр байна гэсэн үг. 

ЭМДҮЗ-ийн гишүүдийг УИХ-аар сонсгол явуулж, Нийгмийн бодлогын байнгын хорооноос томилдог. Засгийн газрын гурван гишүүн, даатгуулагчаас гурав, ажил олгогчоос гурван хүнийг сонгож, оролцуулдаг. Тус зөвлөлийн гишүүд хуралд сууснаар тодорхой хэмжээний урамшуулал авдаг. Би ажиллаж байх үедээ цалингийн доод хэмжээтэй дүйцэхүйц урамшуулал авч байсан.

ЭМДҮЗ-ийн дэд дарга асан, УИХ-ын дарга асан Д.Дэмбэрэл: 

-Эрүүл мэндийн даатгалын хөрөнгийн хэмжээ хоёр их наяд төгрөгт дөхөж байгаа. ЭМДҮЗ-ийн гишүүдийн урамшууллыг УИХ эргэж харах нь зүйтэй. Хөдөлмөрийн хөлсний доод хэмжээгээр гишүүдэд улиралд нэг удаа урамшуулал өгч байгаа. 320 мянган төгрөгийн хөдөлмөрийн хөлсний хэмжээтэй байхад сард 100 мянган төгрөг ногдож байсан. 

Бид ийм л урамшуулал авч ажиллаж байсан. Гэхдээ хариуцлагын түвшинд урамшууллаа нэмээрэй. Үүнийг авч үзэх ёстой асуудал" гэв.