Лхагва гаригийн Засгийн газрын ээлжит хуралдаанаас гарсан "Гурилын импортын татварыг тэглэх" тухай Засгийн газрын тогтоолын талаар ЗГХЭГ-ын дарга Д.Амарбаясгалан танилцуулжээ.  Ингэхдээ "Гурил, гурилан бүтээгдэхүүн хямдарвал инфляци буурна. Инфляц буурвал арилжааны банкны хүү багасах нөхцөл бүрдэнэ" гэсэн байна. 

Мөн хүнсний улаан буудайн тариалалтыг нэмэгдүүлж, дотоодын хэрэгцээнээс давсан хэсгийг экспортлох шийдвэр гарчээ. 

Д.Амарбаясгалан: 

-"Монгол Улсын бүх төрлийн гурил хилийн цаана худалдаалагдаж байгаа гурилаас 3-4 дахин өндөр үнээр зарагдаж байна. Гурилын салбарт давамгай байдал бий болж, үнийг нь өндөр түвшинд тогтоосон гэж Засгийн газраас үзсэн.

600-700 грамм гурилаар үйлдвэрлэж байгаа гурилан бүтээгдэхүүний үнэ иргэдийн худалдан авах чадварт шууд нөлөөлж байна. Үндсэндээ 9,000 орчим төгрөгөөр 600-700 грамм жинтэй гурилан бүтээгдэхүүн худалдан авч байгаа нь ард иргэдийн амьжиргаанд шууд нөлөөлж байна. 

Гурил, гурилан бүтээгдэхүүн нь инфляцийн 30 орчим хувьд нөлөөлдөг учраас зах зээлийн өрсөлдөөнд оруулах зарчмаар үнийг буулгаж, ингэснээр инфляци буурах боломжтой. 

Өнөөдрийн байдлаар инфляци долоон хувьд тогтсон байгааг статистик мэдээллээс харж байна. Гурил болон гурилан бүтээгдэхүүний үнэ хямдарвал инфляци дахин буурна. Инфляц буурвал арилжааны банкны хүү буурах нөхцөл бүрддэг. Тиймээс эдийн засагт эерэг нөлөөлөл үзүүлэх шийдвэр.

УИХ-д байгуулагдсан ажлын хэсэг энэ асуудлаар ойрын хугацаанд шийдвэр гаргах байх. Үүнтэй холбогдуулан улаан буудайн тариаланчид яах вэ гэдэг асуудал дагалдана. Улаан буудайн салбар уналтад орох уу эсвэл илүү баталгаатай, өргөн хүрээгээр улаан буудай тариалах нөхцөл боломж бүрдэх үү гэдгийг тариаланчид асууж байгаа. Засгийн газраас улаан буудайн салбар эрсдэлд орохгүй байх бодлогыг барьж байна" гэв. 

"Улаан буудайн экспортоос жилд 300-500 сая ам.доллар олох боломжтой"

Д.Амарбаясгалан: 

-"Олон жилийн турш ердөө 400,000-хан тонн улаан буудай тарих орон зайд бизнес эрхэлж байсан. Энэ бодлогоос Засгийн газар татгалзаж, дотоод зах зээлийг хангасныхаа дараа илүү гарсан улаан буудайг дэлхийн зах зээлд экспортод гарах боломжийг 100 хувь нээж өгөх шийдвэрийг гаргаж байна.

Өөрөөр хэлбэл дотоодын хүнсний хэрэглээнд шаардлагатай байгаа улаан буудайн нөөцийг хангасны дараа илүүдэл улаан буудайг экспортод гаргана. 

Улаан буудайн тариаланчдын хувьд жилд зарсан улаан буудайн дундаж үнэ 750,000 төгрөг байна. Энэ нь тариаланчдын цаашдын өсөж хөгжих боломжийг хязгаарлаж байна.

Гурилын үйлдвэрүүд монопол болсны улмаас улаан буудайн салбарт өрсөлдөөн байхгүй, улаан буудайг биржээр зарах боломжгүй байсан. Тиймээс үнийн доод хязгаарыг жил болгон тогтоож өгдөг байя. Биржээр болон өрсөлдөөний зарчмаар улаан буудайг зарж борлуулах боломжийг тариаланчдад олгоно. 

400,000 тонноор хязгаарлагдаж байсан зах зээлийг нээж, экспортод гаргах замаар жилд 1,000,000-2,000,000 тонныг тарьж ургуулж, борлуулах боломжийг нээж өгнө. Ингэж чадвал улаан буудайн экспортоос жилд 300-500 сая ам.долларыг олох боломж байна. Экспортыг чөлөөлөх, улаан буудайн доод үнийг тогтоох Засгийн газрын тогтоол албан ёсоор гарсан" гэв.