Хотын дарга Х.Нямбаатар өчигдөр өөрийн цахим хуудсандаа "Зоригийн хөшөөний газрыг заржээ! Зараад зогсохгүй хөшөөг нүүлгэн шилжүүлж газар дээр нь цамхаг барихаар санаархаж байна. Бид "Зоригтой"-гоо үлдэнэ" гэсэн агуулга бүхий мэдээллийг нийтэлжээ.

Тэр энэ тухай "Зоригийн хөшөөний газрыг заржээ! Зараад зогсохгүй хөшөөг нүүлгэн шилжүүлж газар дээр нь цамхаг барихаар санаархаж байна. Үр могой эхийгээ залгидаг шиг МоАХ-оос улбаатай энэ байгууллага их л эелдгээр "Зориг сан"-д хөшөөг нүүлгэн шилжүүлж өгнө үү гэжээ. Лав л Монгол хүний дотор хэзээ ч ийм атгаг шуналын сэдэл төрөхгүй. Монголын түүхэнд хар толбо болж үлдсэн цуст хэрэгт гэмгүй иргэдийг хэлмэгдүүлэн яллаж, ахуйн гэмт хэрэг болсон мэт ойлголт өгөхийг одоо болтол хичээсээр байгаа нь ойлгомжтой болсоор байна. Монголыг хайрладаггүй нүгэлт хар гөрөөчний бүхэл бүтэн тролл арми байгааг өнөөдөр харлаа. Монголын ардчиллыг эднээс хамгаалах хэрэгтэй болжээ гэдгийг ч бас харлаа. Бид "Зоригтой"-гоо үлдэнэ" хэмээн бичсэн юм.

Харин өнөөдөр АН-аас С.Зоригийн хөшөө сүндэрлэж буй газрын асуудлаар мэдээлэл хийлээ.

АН-ын Хэрэг Эрхлэх газрын дарга Н.Лхагвадорж:

-"С.Зоригийн хөшөө нь ардчилсан хувьсгалын гол баатруудын нэг. С.Зориг агсны нэрээр худал мэдээлэл тарааж, иргэдийн сэтгэлзүйгээр тоглож байгаа Нийслэлийн засаг дарга бөгөөд Улаанбаатар хотын захирагч Х.Нямбаатар таныг явуургүй улс төр хийхээ болихыг шаардаж байна.

Уг хөшөө нь "Зориг сан"-гийн өмч. С.Зоригийн хөшөө байрлаж буй газар нь нийслэлийн нийтийн өмч. Нийслэлийн нийтийн өмчийн газрыг АН мэдэхгүй.

Хоёр давхар цэнхэр байшинд АН-ын Хэрэг эрхлэх газар үйл ажиллагаа явуулдаг бөгөөд сар бүр түрээс төлдөг. Уг байшингийн эзэмшигч "Шинэ Дэвшилт Холбоо" ТББ.

Тэгэхээр хөшөөний газар дээр байшин барих, С.Зориг агсны хөшөөг холдуулах гэж байгаа талаарх мэдээллийг Нийслэлийн газрын алба, "Зориг сан"-гаас тодруулах хэрэгтэй. АН шинэ байр барих, С.Зориг агсны хөшөөг хөдөлгөх санаачлагч биш. Одоогийн байдлаар "Шинэ Дэвшилт Холбоо" ТББ-аас АН-ыг байрнаасаа гарахыг шаардсан мэдэгдэл ирээгүй байна" гэв.