Шатахуун нийлүүлэлтийн доголдол, эрчим хүчний асуудал сүүлийн хэд хоногт манай улсын хамгийн хурц асуудал болоод байна. Ийм үед эрсдэлийн менежменттэй болох ёстой гэдгийг УИХ-ын дарга Г.Занданшатар өнөөдөр чуулганы нэгдсэн хуралдааны үеэр анхаарууллаа. 

Г.Занданшатар: 

-"Засгийн газар гал унтраах байдлаар ажиллахаа болих хэрэгтэй. V цахилгаан станц, Тавантолгойн цахилгаан станц яасан бэ, Б.Чойжилсүрэн сайд аа. Арав, хорин жил ярьж байна. 

Эрсдэлийг даван туулах төлөвлөгөөтэй байх нь туйлын чухал. Нэг асуудал гарахаар л болохоо болилоо гэдэг. Шатахуун ч гэсэн тэр. Цаад тал чөлөөтэй нийлүүлж байгаа юм байна лээ. Гол нь тээвэр логистикийн саатал, дайн байлдааны нөхцөл байдал, дотоодын зохиомол хомсдол үүсгэж байна. Гадаадын зарим компани асар их дизель түлш нөөцөлж, зохиомол хомсдол үүсгэж байгаа гэх мэдээлэл бий. Тэд нар гарч байж л энэ зохиомол хомсдол алга болно. 

Хүмүүсийг цочирдуулаад, бүх приус машин нэг дор банкаа дүүргэхэд манайх 10 сая литр шатахуун дутагдах юм байна лээ. Манайх шатахууны нөөцтэй болох хэрэгтэй. Аль дээр л нөөцийн сав байсан. НИК-ийн нөөцийн савыг төмрийн хогонд гадагшаа зарчихсан. Одоо нөөцийн савгүй.

Улсын стратегийн нөөцийн савтай байх хэрэгтэй байна. Үүнийг Засгийн газар, Монголбанк ярьж байгаад нөөцийн савыг санхүүжүүлэх хэрэгтэй. 

Газрын тосны үйлдвэр бас яасан? Нэг үл үзэгдэгч хамаг юмыг зогсоож байдаг. Цахилгаан станц ч тэр, газрын тосны үйлдвэр ч тэр. Тэр үл үзэгдэгч хүчийг хэн гэдгийг бид бүгдээрээ мэдэж байгаа. Үүнд шийдвэртэй арга хэмжээ авах хэрэгтэй" гэв.