"Нүүрсний хулгай" гэх хэргийн нотлох баримтыг шинжлэн судлах эхний сонсгол арванхоёрдугаар сарын 4-8-нд товлогдсон бөгөөд энэ удаагийн сонсголоор жижиг Тавантолгой буюу орон нутгийн өмчит "Тавантолгой" ХК-тай холбоотой асуудлыг хэлэлцэхээр тогтсон байна.
Харин хоёр дахь сонсголд Гаалийн Ерөнхий Газрын даргаар ажиллаж байсан хүмүүсийг дуудна хэмээн Хууль зүй, дотоод хэргийн сайд Б.Энхбаяр мэдээлэв.
Тэрээр "Гаалийн Ерөнхий Газарт ажиллаж байсан үе үеийн удирдах албан тушаалтнуудыг хоёр дахь сонсголын үеэр дуудна. Энэ бүх нүүрс хил, гаалиар яагаад бүртгэлгүй гарсан бэ гэдэгт асуудал байгаа. Монгол Улсын гааль болон Хил хамгаалах байгууллагын удирдлагаар ажиллаж байсан бүх хүн дуудагдана.
"Эрдэнэс Тавантолгой" ХК-тай холбоотой, тэдний санхүүжүүлж, хэрэгжүүлсэн бүх төсөл хөтөлбөрийг хоёр дахь удаагийн сонсгол дээр сонсоно. Гэрчүүдийнхээ нэрсийн жагсаалтыг гаргана" гэлээ.
