Монгол улсын Их хурал, Олон Улсын Парламентын Холбоотой хамтран зохион байгуулсан “Хүний эрх, жендэрийн мэдрэмжтэй парламент” өөрийн үнэлгээний үйл ажиллагаа өнгөрсөн хоёр өдөр болсон билээ. Тус үнэлгээний үр дүнг танилцуулах хэвлэлийн бага хурлыг өнөөдөр боллоо. 

Энэ үеэр Олон Улсын Парламентын Холбооны Жендэрийн түншлэлийн хөтөлбөрийн мэргэжилтэн Мариана Дуарте "Бид Монгол Улсын Их Хурлаас өөрийн үнэлгээг санаачлан гаргаж буй явдалд дэмжлэг үзүүлэхээр ирсэн экспертүүд юм. Монгол Улс сайн дурын үндсэнд өөрийн үнэлгээг хийж байгаа нь энэ засаж сайжруулах, бэхжүүлэх зүйлс байгаагаа хүлээн зөвшөөрч буйн илрэл гэж үзэж байна. Ямар асуудал чухал байгааг харж буйн илрэл" хэмээв. 

Парламентын өөрийн үнэлгээний Үндэсний зөвлөх Б.Болорсайхан “Хоёр өдрийн өөрийн үнэлгээний арга хэмжээнд үндэсний зөвлөхөөр ажиллалаа. Парламентын хяналтыг улам сайжруулах, Засгийн газар хууль хэрэгжүүлэх үүргээ хариуцлагатайгаар биелүүлэх мөн ХЭҮК-ын шаардлага зөвлөмжийг бүрэн хэрэгжүүлдэг байх нь чухал гэдэг санааг хөндсөн.

Батлагдан гарч буй хууль хүний амьдралд хууль зүйн баталгаа болохын зэрэгцээ бодитой хэрэгжиж, үр нөлөөг үзүүлэхэд тал талын хамтын ажиллагаа чухал гэж асуудлаа тодорхойлж гаргаж ирсэн.

Түүнчлэн ХЭҮК-ын зүгээс хүний эрхийн зөрчил асуудал, нийгмийн бүлгийн тулгамдаж буй бэрхшээл саадтай нүүр тулж судлаад зөвлөмж шаардлага хүргүүлэхэд тэр нь төрийн байгууллагын зүгээс болон бусад этгээдийн зүгээс хэрэгжилт харилцан адилгүй байна. Үүнд анхаарах нь зүйтэй гэж үзсэн" гэлээ. 

Олон улсын зөвлөх Мэг Мүнн "УИХ өөрийн үнэлгээг өөрсдөдөө явуулж байгаа нь чухал. Монгол Улс үндэсний зөвлөхүүд, экспертүүдийн болон бусад байгууллагуудын оролцоотойгоор өөрийн үнэлгээг явуулж байгаа нь маш чухал. Бидний зүгээс энэ үйл явцад дэмжлэг үзүүлэх гэж ирсэн. Өөрөөр хэлбэл дэлхийн бусад оронд хэрэгжсэн сайн туршлагууд, олон улсын жишгийн талаарх зөвлөмжийг өгч байна" гэлээ. 

Монгол Улсын парламент анх удаа өөрсдийнхөө үйл ажиллагаанд үнэлэлт дүгнэлт өгч байгааг мэдээллийн төгсгөлд Улсын Их Хурлын Тамгын газрын Парламентын судалгаа, сургалтын хүрээлэнгийн захирал Ц.Цогзолмаа онцолсон юм.