УИХ-ын чуулганы нэгдсэн хуралдаанаар Авлига албан тушаалын гэмт хэрэгтэй тэмцэх хууль эрх зүйн орчныг боловсронгуй болгох талаар хэлэлцэв.
Энэ үеэр УИХ-ын гишүүн Б.Пүрэвдорж "Ялын бодлогыг хичнээн чангалж, авлигалын эсрэг хууль баталлаа ч авлига буурахгүй байгаа үндсэн шалтгаан бол дээд дарга нартай холбоотой. Дээд дарга нар долоон жилийн турш тоогоо алдсан их хэмжээний хулгайд холбогдсон. Одоо дунд, доод шатны албан хаагчид дээд дарга нар ингэж хулгайлж байгаа юм чинь бид ч бас яадаг юм гэсэн байдалтай асуудалд ханддаг болсон.
Ганцхан нүүрсний хулгайг ярьвал, 29 км газар гурван саяар тээвэр хийдэг байтал 120 сая төгрөгөөр тээвэр хийсэн байна. Нэг улирал С зөвшөөрөл авахын тулд 20 сая төгрөг өгч байна. Авлига хээл хахууль Монголын хөгжлийг хойш татаж байгаа.
Өнөөдөр ЖДҮ, Хөгжлийн банк, Төмөр зам, ногоон автобус, нүүрсний зэрэг хулгайд холбогдсон хүмүүс нэгэндээ барьцаалагдаж, нэгэндээ үг хэлж, хариуцлага тооцож чадахаа больсон.
Ялын бодлого хангалттай чанга байгаа. Одоо асуудал гаргасан хүмүүсээ шийтгээд явмаар байна. Өөрийнхөө хүмүүсийг зүгэр орхичихоод, барьцаалагдсан маягтай байгаа нь л асуудал болоод байна.
Сүүлийн үед албан тушаалтнууд "МАН ийм муу нэртэй байгаа юм чинь ялагдах юм байна. Байгаа дээр нь идэж уугаад авъя" гэсэн замбараагүй хандлагатай болчихож" гэлээ.
