Нийслэлийн нийтийн тээврийн парк шинэчлэлтийн хүрээнд Солонгосын "Zyle Daewoo" компаниас худалдан авсан шинэ гэх тодотголтой хуучин ногоон автобуснууд нийгмийг бүхэлд нь бухимдуулж, үүнээс үүдэн уг асуудыг хариуцаж байсан Нийслэлийн Засаг Дарга бөгөөд Улаанбаатар хотын захирагч Д.Сумьяабазар, Монгол Улсын сайд, Түгжрэлийг бууруулах үндэсний хорооны дарга Ж.Сүхбаатар албан тушаалаасаа огцорсон билээ.
АТГ уг ногоон автобусны хэргээр “Тэнүүн Огоо” ХХК-ий Ерөнхий Захирал А.Ганхуяг, Нийслэлийн худалдан авах ажиллагааны газрын хэлтсийн дарга Б.Түмэнжаргал, Нийслэлийн худалдан авах ажиллагааны газрын төлөөлөл худалдан авах ажиллагааны хэлтсийн мэргэжилтэн Ш.Баярсүх, “Тэнүүн Огоо” ХХК-нд гүйцэтгэх захирал Ж.Эрдэнэбат нарын тэргүүтэй 20 гаруй хүнийг шалгаж буй юм.
Мөрдөн шалгах ажиллагааны эхний үр дүн ч гарсан бөгөөд энэ хүрээнд УИХ-ын гишүүн Ж.Сүхбаатарыг зайлшгүй шалгах шаардлага үүсчээ. Учир нь ногоон автобус худалдан авах шийдвэрийг биечлэн гаргасан дунд шатны албан тушаалтнууд түүнтэй гүнзгий холбоотой хүмүүс гэдэг нь тодорхой болсон аж.
Гэвч Ж.Сүхбаатар өөрийг нь шалгах вий, бүрэн эрхийг нь түтгэлзүүлэх вий гэдгээс маш их айж буй гэх бөгөөд ногоон автобусны хэрэг удахгүй мартагдчихна, би ч 2024 он хүртэл УИХ-ын гишүүн хэвээрээ дуусмаар байна гэдгээ МАН-ын удирдлагуудад илэрхийлсэн байна.
Харамсалтай нь МАН-ын удирдлагуудын дийлэнхи нь түүний саналыг хүндэтгэн, Ж.Сүхбаатарт ямар ч ял шийтгэл өгөхгүй хамгаалж үлдэхээр шийдсэн ажээ.Нийслэлийн Засаг Дарга бөгөөд Улаанбаатар хотын захирагч асан, Нийслэлийн МАН-ын хорооны дарга Д.Сумъяабазар ч ямар нэгэн хуулийн хариуцлага хүлээхгүй бөгөөд уг хэргийг бүхэлд нь дунд шатны хэдэн албан тушаалтан болон "Тэнүүн Огоо" компанийханд үүрүүлж, тэднийг золиослохоор шийдсэн бололтой.
sonin.mn
