Коронавирусийн халдварт цар тахлын онцгой байдлын үед Засгийн газраас авч хэрэгжүүлсэн төсөл хөтөлбөрүүд, олон улсын байгууллагаас авсан зээл, тусламжийн зарцуулалт, орлого, зарлагыг нийтэд ил болгох тухай асуудлаарх Ерөнхий хяналтын сонсгол өнөөдөр Төрийн ордонд эхэлсэн. 

Гэвч УИХ дахь АН-ын бүлгээс "Төсөл, хөтөлбөрийн зарцуулалт дээр ажиллах шинжээч байхгүй, шинжээч томилох гэхээр МАН-ын гишүүд нь зориуд ирцээ бүрдүүлэхгүй байна" хэмээн эсэргүүцсэнээр өнөөдрийн сонсгол хойшиллоо. Сонсголын үеэр МАН-ын гишүүдийн хэлсэн байр суурийг хүргэж байна.

Сангийн сайд Б.Жавхлан:

-О.Цогтгэрэл даргаа энэ жаахан ойлгомжгүй зүйл боллоо шүү. Сонсгол хийнэ гэснээрээ хийнэ үү. Бид өнгөрсөн 2-3 жил маш хүнд үеийг өнгөрүүлсэн. Эрүүл мэндийн талдаа амжилттай даван туулсан. Эдийн засгийн асуудал одоо ч хүнд хэвээрээ байгаа.

Төрийн албан хаагчдыг зовоохгүйгээр сонсголоо яаралтай хийгээд олон нийтэд зөв мэдээлэл өгөх хэрэгтэй байна. Тэгэхгүй бол дараагийн КОВИД болоход ажил хийх төрийн албан хаагч олдохгүй шүү. Шинжээчтэй, шинжээчгүй сонсголоо яаралтай хиймээр байна. Төсөвтэй холбоотой мэдээллийг Сангийн яамнаас өгөхөд бэлэн. 

Эдийн засгийн байнгын хорооны дарга, УИХ-ын гишүүн Ц.Цэрэнпунцаг:

-Өнөөдөр сонсголоо явуулчихсан байна, ажлын хэсэг гараад дөрвөн сар болж байна. Засгийн газар ажлын хэсэг хоёр яаж харилцсан нь байнгын хороон дээр хамаагүй асуудал. Байнгын хороо хуулиа барьж ажиллах ёстой.

Нийтийн сонсголын тухай хуульд зааснаар нийтийн сонсголын товыг дахин зарлах асуудал болохоос хойшлуулах зохицуулалт биш. Өнөөдөр бол нэлээн цэгцлэгдсэн материалууд байх ёстой. Нэг талаас сонсголыг хийе гэсэн хүсэл зориг Ажлын хэсгийнхэнд дутагдаад байна уу гэж харж байна.