Коронавируст цар тахлын онцгой байдлын үед Засгийн газраас авч хэрэгжүүлсэн төлөвлөгөө, төсөл хөтөлбөрүүдийн санхүүгийн зарцуулалт, гадаадын орнуудаас авсан зээл, тусламж, иргэн, аж ахуйн нэгжүүдийн хандив, тусламж болон тэдгээрийн орлого, зарлагыг нийтэд ил болгох тухай асуудлаар ерөнхий хяналтын сонсголыг 2023 оны аравдугаар сарын 23, 24-ний өдрийн 10:00 цагт зохион байгуулахаар товложээ. 

Гэвч эрх баригчдын сэмхэн үйлдэл энэ сонсголыг үр дүнгүй болгох чиглэл рүү орсон нь үйлдлээс нь харагдаж байна.

Цар тахал эхэлснээс хойшхи үеүдэд хүний эрхийг зөрчсөн маш олон тохиолдол гарсан. Мөн эдийн засгийг сэргээх хөтөлбөр болон Засгийн газрын худалдан авалтын хүрээнд олон маргаантай асуудал хөндөгдөж байсан. Асуудал дагуулсан худалдан авалтын баримтууд одоо ч хаагдмал, тодорхой хариугүй байсаар байна.  

АН-ын бүлгийн гишүүд ковидын асуудлаар ерөнхий хяналтын сонсгол зохион байгуулах шийдвэрийг өнгөрсөн зургадугаар сард гаргаж байсан.

Гэтэл намрын чуулган эхэлснээс хойш тус сонсголд хөндлөнгийн шинжээч оруулах ажлын хэсгийн саналыг энэ сарын 10-нд болох Эдийн засгийн байнгын хорооны хуралдаанаар хэлэлцэгдэх ёстой байсан ч ирц хүрээгүй байна.

Эрх баригчид шинжээч томилж өгөхгүй, ковидын сонсголыг бойкотолж, сонсголыг үр дүнгүй болгохоор шийдсэн нь хурлын ирцээс харж болохоор байна.

Товчхондоо Ковидын асуудлаар зохион байгуулах ерөнхий хяналтын сонсголыг явуулахгүй байх нөхцлийг санаатайгаар бүрдүүлж байгаа гэсэн үг юм.

"Ковид-19" цар тахлын үеэр Засгийн газраас авч хэрэгжүүлсэн арга хэмжээний талаар иргэд үнэн зөв мэдээлэл авах эрхтэй.