Хөх хотод Ерөнхий  консул асан Д.Мөнх-Эрдэнэд холбогдох гэм буруугийн шүүх хурал өнөөдөр Сүхбаатар дүүргийн Эрүүгийн хэргийн анхан шатны шүүхэд болов. Шүүх хуралдаан эхлэхэд АН-ын зарим гишүүд Д.Мөнх-Эрдэнийг суллахыг шаардаж шүүхийн гадаа эсэргүүцлээ илэрхийлэв.

Шүүгдэгч Д.Мөнх-Эрдэнэ болоод түүний өмгөөлөгчийн зүгээс хуралдаан даргалагч шүүгчээс Эрүүгийн хэрэг хянан шийдвэрлэх тухай хуулийн 11 дүгээр зүйлийн 1 дэх хэсгийн 1.4 хэсэгт заасан үндэслэлээр татгалзах хүсэлт гаргасан байна. Түүний хүсэлтийг ерөнхий шүүгч хянаж үзээд “татгалзах үндэслэл тогтоогдоогүй” хэмээн үзэж хүсэлтийг хүлээн авахаас татгалзжээ.

Мөн Д.Мөнх-Эрдэнэ болон түүний өмгөөлөгч, прокуророос татгалзсан. Энэ хүсэлтийг даргалагч шүүгчийн зүгээс Эрүүгийн хэрэг хянан шийдвэрлэх тухай хуулийн 17.2-т зааснаар татгалзах хүсэлтийг үндэслэлгүй хэмээн үзэж хүлээж авахаас татгалзсан байна. 

Д.Мөнх-Эрдэнийг Нийслэлийн прокурорын газраас Эрүүгийн хуулийн тусгай ангийн 22.5 дугаар зүйлийн 1 дэх хэсэг, 22.4 дүгээр зүйлийн 4 дэх хэсэг, 22.1 дүгээр зүйлийн 2 дахь хэсэг, 13.14 дүгээр зүйлийн 1 дэх хэсэг, 23.1 дүгээр зүйлийн 1 дэх хэсэгт тус тус заасан гэмт хэрэгт эрүүгийн хэрэг үүсгэж, яллагдагчаар татаад байгаа юм. Түүнийг шүүхээс хоёр удаа суллаж, гурван удаа цагдан хорьсон. Прокурорын зүгээс оргон зайлах, үгсэн хуйвалдах, хэргийн материалыг устгаж болзошгүй гэх үндэслэлээр хорих хүсэлт гаргасныг шүүх хүлээн авсан байдаг. 

Д.Мөнх-Эрдэнийн өмгөөлөгч Л.Баттогтохын цагдан хорих таслан сэргийлэх арга хэмжээг өөрчлүүлэх хүсэлт гаргаж,  учруулсан хохирол болох 82 сая төгрөгийг шүүхийн дансанд шилжүүлэхэд бэлэн гэдгийг хэлсэн боловч шүүгчид түүний хүсэлтийг хүлээн авахаас татгалзсан байна.

Д.Мөнх-Эрдэнэ нарт холбогдох эрүүгийн хэргийн шүүх хуралдаан маргааш 10.00 цагт үргэлжлүүлэн хуралдана.