УИХ дахь АН-ын бүлгийн гишүүн Д.Бат-Эрдэнийн бүрэн эрхийг түдгэлзүүлэх шийдвэрийг УИХ гаргасантай холбогдуулан АН-ын нарийн бичгийн дарга О.Баасанхүү сэтгүүлчдэд мэдээлэл хийлээ.

О.Баасанхүү:

-Өмнөговь аймгаас УИХ-д сонгогдсон Д.Бат-Эрдэнийн бүрэн эрхийг түдгэлзүүлсэн шийдвэрийг УИХ-аас гаргалаа. Ардчилсан нам УИХ-д 11 гишүүнтэй, гэтэл нэгийнх нь бүрэн эрхийг байхгүй болголоо.

АН анхнаасаа эрх чөлөө, шударга ёс, хүний эрхийг дээдэлдэг гэдэг утгаараа аливаа гэмт хэрэг дээр гишүүдээ өмгөөлж, хамгаалж байгаагүй. Бид нар хулгайн хэрэгт холбогдсон Ерөнхийлөгч, Ерөнхий сайд байна уу, өөрсдөө сайн дураар очиж шалгуулах ёстой гэж мэдэгдэж ирсэн. Энэний дагуу манай намын гишүүдээс эрүүгийн хэрэгт сэрдэгдэж байгаа нь хууль хяналтын байгууллагад шалгуулж байсан.

Гэвч сүүлийн хэд хоног АН болон намын даргын нэр хүндийг гутаах зорилготой, Ардын намын санхүүжилттэй гэж хардаж байгаа “УИХ-ын гишүүн Д.Бат-Эрдэнэ нэг тэрбум төгрөгийг гишүүдэд өгч, худалдаж авч байна” гэсэн гүтгэлэг дайралт завсаргүй цацагдлаа. Энэ асуудлаар АН-аас ажлын хэсэг гарч, энэ асуудлыг шалгана, хууль хяналтын байгууллагаар шалгуулна.

Хоёрдугаарт, Халдашгүй байдлын дэд хорооогоор гишүүдийн бүрэн эрхийн асуудлыг хэлэлцэхдээ АН-ын бүлгийн төлөөллийг зориуд зохион байгуулалттай оруулаагүй. Парламентад Өмнөговийн төлөөлөл хэн байх вэ гэдгийг Ардын намынхан хуйвалдааны аргаар шийдлээ. Энэ асуудалд АН  хариуцлагатай хандах болно.

УИХ-ын тухай хуулийн 9.8-ийг үндэслэн Улсын ерөнхий прокурор нэр бүхий гишүүдийн бүрэн эрхийг түдгэлзүүлэх хүсэлтээ гаргасныг бид хэвлэлээс харсан. Энэ заалт нь гэмт хэргийг шалгахаар биед нь үзлэг хийх гэхэд, орон байранд, албан тасалгаанд үзлэг хийх болоход болохгүй байгаа учраас эрхийг нь түдгэлзүүлэх шаардлага байна гэсэн үг. УИХ 9.7-г үндэслэн Өмнөговийн төлөөллийг дахин оруулж ирэх талаар УИХ-ын нэгдсэн чуулган дээр Д.Бат-Эрдэнийн бүрэн эрх нь буцаан сэргээгдсэн гэдэг мэдээллийг уншихыг бид хүсч байгаа.

Гэмт хэргийг шалгаж байгаа нэрээр хугацаагүй шалгадгийг болих ёстой. Нүүрсний хулгайн талаар манай намын зүгээс анх шүгэл үлээж, “20 орчим их наяд төгрөгийн нүүрсний хулгай байна, шалгах ёстой” гэдэг мэдээллийг миний бие хийж байсан. Гэтэл өнөөдөр тэд нэг ч төгрөгийг төсөвт оруулж ирээгүй. Нүүрсний хулгай гэдгийг бид ойлгохдоо оффтейк гэрээг шалгаад 3 их наяд төгрөгийг битүүмжлээсэй гэж хүссэн. 20 их наяд төгрөгийг оффшорт оруулсан асуудлыг шийдээсэй гэж бид хүссэн. Харамсалтай нь, сөрөг хүчин рүүгээ дайрсан, гутаасан.  Хулгайн мөнгөөрөө хэвлэлийг худалдаж авсан байдлаар явж байгаад харамсч байна.

Хууль хяналтын байгууллагад хандахад хуулийн хүрээнд УИХ-ын гишүүн асан Д.Бат-Эрдэнийн асуудлыг түргэн шуурхай шалгаад, УИХ-ын тухай хуулийн 9.7-д заасны дагуу бүрэн эрхийг нь буцаан сэргээх асуудалд Улсын ерөнхий прокурорыг анхаарч ажиллахыг хүсч байна гэлээ.