УИХ-ын гишүүн Т.Аюурсайхан, Д.Бат-Эрдэнэ, Н.Наранбаатар нарын бүрэн эрхийг түдгэлзүүлэх эсэх асуудлыг чуулганаар хэлэлцэж буйтай холбогдуулан гишүүн Б.Пүрэвдорж өөрийн байр сууриа илэрхийлжээ. Б.Пүрэвдорж: 

-Өнгөрсөн жил УИХ-ын дөрвөн гишүүний бүрэн эрхийг түдгэлзүүлэх эсэх асуудлыг оруулж ирж байсан. Тэдгээр гишүүдийн бүрэн эрхийг түдгэлзүүлээгүй хэдий ч хууль шүүхийн байгууллагаас дуудсан цагт нь очоод мэдүүлэг өгөөд, хэрэг нь шүүхээр шийдэгдэх гээд явж байна. Тиймээс УИХ-ын нэр бүхий гурван гишүүний бүрэн эрхийг түдгэлзүүлэхгүйгээр хуулийн байгууллага мөрдөн шалгалтын үйл ажиллагаагаа явуулж, гишүүд дуудсан цагт нь очоод шүүхээр асуудлаа шийдүүлэх боломж нь бий. Ийм боломж байсаар байхад сөрөг хүчнийхээ нэг гишүүнийг сугалах гэж байгаад харамсаж байна. Бизнес эрхэлж, хувьцаа эзэмшсэнийхээ төлөө нүүрсний хулгайд холбохыг асуудалтай л гэж харж байна.