-“Хүний хүүхэд хүрэн бөөртэй” буюу маньтай хил залгаа казакууд-

Өнгөрөгч долоо хоногт тэмдэглэн өнгөрүүлсэн казак үндэстний хаврын баяр Наурызын өдөрт Монголын Ерөнхийлөгч оролцжээ. “Монголын” хэмээн тодотгох болсон нь мөн үеэр УИХ-ын “эрхэм” гишүүдийн нэг, Баян-Өлгийгөөс сонгогдсон түшээ Т.Аубакирын хэлсэн үгтэй холбоотой юм. Тэр энэ баярт оролцсон манай Ерөнхийлөгчид хандаж “Казакын ард түмэн биднийг алган дээрээ бөмбөрүүлэн авч явдаг Монголын төр засагт чин сэтгэлээсээ баярлаж явдгаа албан ёсоор хэлье ээ” гэсэн нь сонины хуудсан дээр дурайтал үлдсэн байна. Бүр “албан ёсоор” шүү!!!

Ингээд Монголын казакууд Монголын төрөөс албан ёсоор туурга тусгаарлачихав аа, хөөрхий. Харин газар нутгийг маань хэзээ эргүүлж өгөх юм байгаа юм.

Казак үндэстний хувьд Монголын бусад олон ястнаас огт өөр хэл, соёлтой, өөр шашинтай улс гэдэг нь үнэн. Монголын нутагт хамгийн сүүлд орж ирсэн үндэстэн, ястан гэдэг нь ч үнэн. Ерээд оны системийн задралын Баян-Өлгий аймаг бараг тэр чигээрээ Казакстан руу нүүгээд эргэж ирсэн. Өмнө нь манай казакууд олон ч удаа “хүрэн бөөрөө” харуулж байсан ч арай ч бас энэ удаагийнх шиг “Монголын төр засаг” гэж салгаж хэлж байсан удаагүй. Тэр тусмаа цөөнх үндэстний төлөөлөл болон төр түшилцэж байгаа УИХ-ын гишүүн ийм үг хэлнэ гэдэг шуудхан хэлэхэд манай казакууд 1911 онд монголчууд Манжаас салсантай адил "автономит эрх" шаардаж буйтай агаар нэг юм.