Нүүрсний хэрэгт шалгагдаж буй УИХ-ын гишүүн Т.Аюурсайхан, Д.Бат-Эрдэнэ, Н.Наранбаатар нарын гурван гишүүний бүрэн эрхийг түдгэлзүүлэх саналаа АТГ өнгөрөгч лхагва гаригт УЕП-т хүргүүлсэн тухай бид мэдээлсэн. Тэгвэл прокурорын байгууллагаас уг асуудлаар УИХ-ын даргад хандсан буюу гишүүдийн бүрэн эрхийг түдгэлзүүлэх саналыг прокурорын байгууллага дэмжсэн тухай "шум" үүсээд байна. Энэ асуудлаар өнөөдөр УИХ-ын дарга Г.Занданшатараас тодруулахад,

-Одоогоор надад прокурорын байгууллагаас ямар нэг бичиг ирээгүй. Прокурорын байгууллага гишүүдийн бүрэн эрхийг түдгэлзүүлэх хүсэлтээ ирүүлсэн тохиолдолд УИХ асуудлыг хэлэлцэнэ. Ингэхдээ прокурорын байгууллагаас ирүүлсэн хуулийн үндэслэлийг харж байж УИХ шийдвэрээ гаргах ёстой. Энэ бол хувь гишүүний асуудал биш, ард түмний төлөөлөх эрх, мандатын асуудал яригдаж байгаа учраас гишүүд хариуцлагатай хандах байх. Бүх процесс хуулийн дагуу явах ёстой гэв. 

Сануулахад, прокурорын байгууллагаас гишүүдийн бүрэн эрхийг түдгэлзүүлэх асуудал орж ирсэн тохиодолд УИХ тав хоногийн дотор хэлэлцэн шийдвэрээ гаргах ёстой. Мөн сүүлийн хоёр хоногт, АТГ-аас УЕП луу гишүүдийн хүргүүлснээс хойш төрийн ордонд "хэнийг яаж авч үлдэх вэ" гэдэг кнопны наймаа яваад эхэлсэн гэх яриа ч явж л байгаа. Хэрвээ энэ үнэн байгаад олонхийн хүчээр гишүүдээ хамгаалж үлдэхэд хүрвэл өнгөрсөн хугацаанд хуулийн байгууллагаас явуулсан ажиллагаа ямар ч үр дүнгүй болж, МАН-ын даргын амалсан "шударга ёсны тэмцэл" ухрах араандаа орно.  

Тэгээд ч гишүүний бүрэн эрхийг түдгэлзүүлнэ гэдэг бүрмөсөн чөлөөлнө гэсэн үг биш. Хэргийг шалгаж шийдвэрлэх хүртэл хугацаанд УИХ-ын гишүүний бүрэн эрх гэдэг хамгаалалт, хуягнаасаа сугараад, жирийн иргэний нэг адилаар шалгуулна уу л гэсэн үг шүү дээ.