УИХ-ын чуулганы танхимд өнөөдөр өнгөрсөн 32 жилийн түүхэнд болоогүй "цочир" үзэгдэл болов. Гэвч нэг "авууштай" нь манайхан баргийн юманд цочирдож, бэргэхээ байжээ.

Тодруулбал, УИХ-ын гишүүн, Төрийн байгуулалтын байнгын хорооны дарга Ж.Мөнхбат нүүрсний хулгайн хэрэгт шалгагдаж, яллагдагчаар татагдсаныхаа дараа "Би гэм зэмгүй. Гэм зэмгүй гэдгээ батлахын тулд УИХ-ын гишүүний бүрэн эрхээсээ татгалзаж, жирийн иргэн болж байгаад үнэн мөнөө шалгуулна" гэсэн билээ. Ингээд прокурорын байгууллагын шийдвэрийг ч хүлээлгүйгээр УИХ-ын гишүүнээс чөлөөлөгдөх хүсэлтээ өгсөн байдаг юм. Чөлөөлөгдөх хүсэлтээ бичихдээ "Олон нийтийн эргэлзээ, тээнэгэлзлэлийг арилгахын тулд УИХ-ын гишүүний бүрэн эрхээсээ татгалзаж, жирийн иргэний хувиар шалгуулмаар байна. Ээж маань хүнд өвчтэй, гадаадад эмчлүүлэх шаардлагатай болсон" гэсэн хоёр өөр үндэслэлийг хэлсэн байдаг юм. Уг нь бол аль нэг нь байхад л хангалттай, УИХ түүнийг нь хүлээж авах ёстой. Дургүй ламд дарж байж сахил хүртээлтэй биш.

Гэвч харамсалтай нь мань эр энэ хүсэлтээ өгсөн даруйдаа хил даван одсон байдаг юм. УИХ-ын дарга болон гишүүдийн өмнө түүний гараар бичсэн өргөдлөөс өөр ямар ч баримт байхгүй.

Гэсэн хэдий ч өнөөдөр хуралдсан УИХ-ын нэгдсэн чуулганаас Ж.Мөнхбат гишүүний хүсэлтийг хүлээн авч, УИХ-ын гишүүний бүрэн эрхээс нь чөлөөллөө. Ж.Мөнхбат гишүүн чуулганы нэгдсэн хуралдаанд оролцсонгүй.

Монгол Улс байнгын ажиллагаатай парламенттай болсноос хойших 30 гаруй жилийн хугацаанд нэг бус хүн өөрийн хүсэлтээр чөлөөлөгдөх өргөдлөө өгч байжээ. Заримыг нь чөлөөлсөн, заримыг нь чөлөөлөөгүй. Гэхдээ энэ бүх хугацаанд чөлөөлөгдөх хүсэлтээ өгсөн хүн нь өөрөө УИХ-ын танхимд сууж, чөлөөлөгдөх болсон үндэслэл шалтгаанаа гишүүдийн өмнө тайлагнадаг байв. Тэгээд тэндээс нь гишүүд шийдвэрээ гаргадаг байв. Р.Амаржаргал гишүүн жишээ нь, намынхаа гишүүдтэй санал бодол зөрсний төлөө "УИХ-ын гишүүний бүрэн эрхээ хэрэгжүүлэх боломжгүй болсон" гээд гишүүнээс чөлөөлөгдөх хүсэлт гаргаж байсан удаатай. Түүнийг нь УИХ хүлээж аваагүй.

У.Хүрэлсүх жишээ нь "Эхнэрийгээ гадаадад эмчлүүлэх шаардлагатай болсон" гэж хэлээд чөлөөлөгдөх хүсэлтээ өгч байлаа. Гэхдээ л хэн хэн нь чуулганын хуралдаанд өөрийн биеэр оролцож байсан. Ж.Мөнхбат шиг "хоёр үзүүртэй зүү" шидчихээд хил даваад алга болсон түүх лав байхгүй. Тийм болохоор Ж.Мөнхбатын УИХ-ын гишүүнээс чөлөөлөгдсөн түүх манай парламынтын түүхэнд "үзэгдээгүй юм" болж үлдлээ.