УИХ-ын гишүүн Т.Аюурсайхан, Н.Наранбаатар, Д.Бат-Эрдэнэ нарын бүрэн эрхийг түдгэлзүүлэх саналаа АТГ өчигдөр УЕП-ын газарт хүргүүлсэн байна.  

Нэр бүхий гурван гишүүн нь нүүрсний хэрэгт нэр холбогдон АТГ-т шалгуулж байгаа.  Мөн мөрдөн шалгах ажиллагааны явцад хийгдэх зарим арга хэмжээний явцад (гэр болон албан тасалгаа, автомашинд нь үзлэг хийх, шаардлагатай гэж үзвэл таслан сэргийлэх арга хэмжээ авах) УИХ-ын гишүүний халдашгүй байдал, бүрэн эрх нь саад учруулж байгаа тул түдгэлзүүлэн шалгах шаардлага үүсч буй талаар АТГ-аас өмнө мэдээлж байсан.

Хуульд зааснаар Улсын ерөнхий прокурор нэр бүхий гурван гишүүний бүрэн эрхийг түдгэлзүүлэх шаардлагатай гэж үзвэл УИХ-д өргөн мэдүүлж, УИХ энэ асуудлыг 14 хоногийн хугацаанд багтаан хэлэлцэх ёстой.

Мөн УИХ-ын чуулганы нэгдсэн хуралдаанаар өнөөдөр Ж.Мөнхбат гишүүний бүрэн эрхээсээ чөлөөлөгдөх хүсэлтийг хэлэлцэнэ. Мягмар гаригт хуралдсан Төрийн байгуулалтын байнгын хороо Ж.Мөнхбат гишүүний хүсэлтийг хүлээн авчихаад байгаа. Нүүрсний хэрэгт холбогдсон гишүүдээс одоогоор зөвхөн Ж.Мөнхбат гишүүн бүрэн эрхээсээ чөлөөлөгдөх хүсэлт гаргасан. Харин Т.Аюурсайханы хувьд Засгийн газрын гишүүн, ХНХ-ын сайдын албан тушаалаас өөрийн хүсэлтээр чөлөөлөгдөөд байгаа. УИХ-ын гишүүн Ш.Раднаасэд, Зам тээврийн хөгжлийн сайд асан, УИХ-ын гишүүн Б.Энх-Амгалан нарын хувьд одоогоор бүрэн эрхээсээ чөлөөлөгдөх хүсэлт гаргаагүй байна. 

УИХ-ын хувьд тэр дундаа эрх баригч нам нүүрсний хэрэгт холбогдсон гишүүдээ хамгаалж, бүрэн эрхийг нь түдгэлзүүлэхгүй авч үлдвэл ард түмэн гудамжинд гарч, жагсах болно гэдгээ мэдэгдсээр байгаа. Иймээс эрх баригчдын хувьд энэ удаад Жижиг, дунд үйлдвэрлэлийг хөгжүүлэх сангаас зээл авч, боломж хулгайлсан гишүүдийг хаацайлсан шиг байдлаар хандвал 2024 оны УИХ-ын сонгуульд МАН үсгүй болтлоо хусуулж мэдэх юм.